लोणी देवकर, ता. २१ ः सतत वर्दळीचा असलेल्या पुणे- सोलापूर महामार्गावर भिगवण ते इंदापूर दरम्यान अनेक ठिकाणी खड्डे पडले आहेत. हे खड्डे वाहन चालकांना त्रासदायक ठरत आहेत. या खड्ड्यांमुळे छोटे- मोठे अपघात होत आहेत. मात्र, महामार्ग प्राधिकरणाचे याकडे सोईस्कर दुर्लक्ष होत असल्याचे दिसत आहे.
याबाबत अधिक माहिती अशी की, मुंबई ते बंगलोर या महामार्गावरील भिगवण ते उजनी धरण पूल अंतरात ठिकठिकाणी खड्डे पडले आहेत. खड्ड्यातून मार्ग काढताना वाहन चालकांना प्रवासादरम्यान मोठी कसरत करावी लागत आहे. रस्ते चुकविताना मोठ्या वाहनांच्या होणाऱ्या लेन बदलीमुळे दुचाकी स्वरांचे प्रचंड हाल होत आहेत. त्यातच जर पाऊस झाला तर खड्ड्यांमध्ये पाणी साचत असल्याने खड्ड्यांचा अंदाज न आल्यामुळे अपघाताच्या घटना घडत आहेत. अशा या गंभीर प्रश्नाकडे महामार्ग प्राधिकरण, तसेच टोल प्रशासनाचे जाणीवपूर्वक दुर्लक्ष होत असल्याचे प्रवासी आणि स्थानिक नागरिकांचे म्हणणे आहे.
दरम्यान, सर्वोच्च न्यायालयाने दिलेल्या निर्णयानंतर तरी महामार्ग प्राधिकरण जागरूक होऊन या रस्त्यावरील खड्डे तत्काळ बुजवणार का? जोपर्यंत रस्त्यावरील खड्डे पूर्णपणे बुजविले जात नाहीत तोपर्यंत टोल वसुलीचे आदेश दिले जाणार? सर्वोच्च न्यायालयाच्या निर्णयाला केराची टोपली दाखवत खड्डे तसेच राहणार का? या बाबींकडे प्रवाशांसह स्थानिकांचे लक्ष लागले आहे.

महामार्गावरून प्रवास करत असताना खड्ड्यांमुळे अपघाताची धोका निर्माण होत आहे. टोलच्या माध्यमातून कोट्यवधी रुपये वसूल करणाऱ्या प्रशासनाने चालकांच्या जिवांचीही काळजी घेणे आवश्यक आहे. हे खड्डे तत्काळ बुजवून वाहन चालकांची होणारी गैरसोय टाळावी. अन्यथा खड्डे बुजविले जात नाहीत तोपर्यंत प्रशासनाने टोल वसुली थांबवावी.
- सुभाष काळे, अगोती नं. २

अवजड वाहनांची होते फजिती
पुणे- सोलापूर महामार्गावर मोठे औद्योगिक वसाहतींचे क्षेत्र आहे. ज्यामुळे अवजड वाहनांची वाहतूक या रस्त्यावरून मोठ्या प्रमाणात होत असते. रात्रीच्यावेळी खड्ड्यांचा अंदाज न आल्याने अवजड वाहन चालकांना अपघातांना सामोरे जावे लागत असून, वाहन नादुरुस्त होऊन वाहन मालकांना आर्थिक नुकसान सोसावे लागत आहे.

00214, 00215, 00216