मंचर, ता. १० : ‘‘पिंपळगाव-खडकी (ता. आंबेगाव) येथील श्री मुक्तादेवी यात्रा उत्सवानिमित्त मंगळवारी (ता. ११) व बुधवारी (ता. १२) विविध धार्मिक कार्यक्रम, बैलगाडा शर्यतींचे आयोजन केले आहे.’’ अशी माहिती सरपंच दीपक पोखरकर यांनी दिली.
मंगळवारी सकाळी नऊ वाजता बैलगाडा शर्यतीचा शुभारंभ होणार आहे. बैलगाडा शर्यतीमध्ये प्रथम क्रमांकाला एक लाख रुपये, द्वितीय ७५ हजार रुपये, तृतीय ५१ हजार रुपये, चतुर्थ ३१ हजार रुपये इनाम देण्यात येणार आहे. सतत तीन वर्ष प्रथम येणाऱ्या बैलगाड्याला पाच लाख नऊ हजार एक रुपये रक्कम देण्यात येणार आहे. बुधवारी रात्री मालती इनामदार यांचा लोकनाट्य कार्यक्रम होणार आहे. यात्रेची जय्यत तयारी झाली आहे. अशी माहिती जिल्हा परिषद माजी सदस्य मथाजी पोखरकर व यात्रा समितीचे अध्यक्ष सोपान पोखरकर यांनी दिली.