मंचर, ता. १८ : श्री क्षेत्र वडगाव काशिंबेग (ता. आंबेगाव) येथे वरातीला जात असलेल्या डीजे साउंड सिस्टीम रथाची महावितरण कंपनीच्या खांबाला जोरदार धडक बसली. त्यामुळे विजेचा खांब वाकून वाहिन्या रस्त्यावर पडल्या. सुदैवाने मोठी दुर्घटना टळली. शनिवारी (ता. १७) रात्री साडेआठच्या सुमारास सदर घटना घडली. तबल चोवीस तास होऊनही रविवारी रात्रीपर्यंत ३५० घरांसह गाव अंधारात आहे. या प्रकाराने गावकऱ्यांनी संताप व्यक्त केला आहे.
या भागात बिबट्याचा वावर सर्वत्र आहे. गावठाणात बिबट्याने अनेकदा जनावरावर, शेळ्या, मेंढ्यांवर हल्ले केले आहेत. त्यामुळे गावकऱ्यांमध्ये भीतीचे वातावरण आहे. इयत्ता १०वी व १२वीची परीक्षा देणाऱ्या विद्यार्थ्यांवर सध्या मेणबत्तीच्या उजेडात अभ्यास करण्याचा प्रसंग ओढवला आहे. या संदर्भात महावितरण कंपनीच्या अधिकाऱ्यांनी ताबडतोब कार्यवाही करून वीज पुरवठा सुरळीत करावा, तसेच डीजे चालकाच्या विरुद्ध कारवाई करावी, अशी मागणी गावकऱ्यांनी केली आहे.
दरम्यान, सोमवारी (ता. १९) गावकऱ्यांचे शिष्टमंडळ महावितरणच्या अधिकाऱ्यांना भेटणार आहे, अशी माहिती संत सावता माळी युवा मंचचे संस्थापक संदीप डोके यांनी दिली.

श्री क्षेत्र वडगाव काशिंबेग (ता. आंबेगाव) : विजेचा खांब वाकल्याने व वाहिन्या तुटल्याने खंडित झालेला वीज पुरवठा.