मंचर, ता. २९ : “निवडणूक प्रक्रियेत मतदारांना मतदार चिठ्ठी वाटप करणे हे महत्त्वाचे कार्य आहे. मतदान केंद्रस्तरीय अधिकारी यांचे पर्यवेक्षक व सर्व क्षेत्रीय अधिकारी यांनी मतदार चिठ्ठी अन्य व्यक्तीकडे न देता मतदार किंवा कुटुंब प्रमुखाकडे देण्याची दक्षता घ्यावी. यासाठी सुक्ष्म नियोजन करून समन्वयाने मतदार चिठ्ठीचे वाटप करावे. निवडणुकीच्या अनुषंगाने सर्व कामकाज जबाबदारीने करावे. कोणताही मतदार चिठ्ठीपासून वंचित राहणार नाही. याची दक्षता घ्यावी.” असे आवाहन शिरूर लोकसभा मतदारसंघाचे सहाय्यक निवडणूक निर्णय अधिकारी तथा आंबेगाव-जुन्नर उपविभागीय अधिकारी गोविंद शिंदे यांनी केले.

अवसरी खुर्द (ता. आंबेगाव) येथे शासकीय अभियांत्रिकी महाविद्यालयाच्या आवारात कवयित्री शांता शेळके सभागृहात शिरूर लोकसभा मतदारसंघांतर्गत आंबेगाव विधानसभा मतदारसंघातील अधिकारी व कर्मचाऱ्यांच्या प्रशिक्षण प्रसंगी शिंदे बोलत होते. यावेळी आंबेगावचे तहसीलदार संजय नागटिळक, निवडणूक नायब तहसीलदार सचिन वाघ व सहाय्यक गटविकास अधिकारी अर्चना कोल्हे उपस्थित होते. प्रशिक्षणात मतदान केंद्रस्तरीय अधिकारी, पर्यवेक्षक व क्षेत्रीय अधिकारी सहभागी झाले होते.