मंचर, ता. ८ : वाळुंजवाडी (ता. आंबेगाव) येथील नितीन वाळुंज व नीलेश लोंढे यांनी वाळुंजवाडी ग्रामपंचायत येथील गैरकारभाराची चौकशी व्हावी, या मागणीसाठी पुण्याच्या जिल्हाधिकारी कार्यालयासमोर चार दिवस उपोषण केले होते. ग्रामपंचायत कामकाजाची चौकशी समितीची नियुक्ती झाल्यामुळे उपोषण स्थगित केल्याचे त्यांनी सांगितले.
लोंढे म्हणाले, ‘‘पुणे जिल्हा परिषदेचे मुख्य कार्यकारी अधिकारी यांच्या आदेशानुसार चौकशी समिती स्थापन केली आहे. तक्रारदारांच्या समक्ष चौकशी पूर्ण होऊन दहा दिवसांत चौकशी अहवाल जिल्हा परिषदेला सादर केला जाईल. त्यामुळे आम्ही उपोषण मागे घेतले आहे.’’
दरम्यान सरपंच वैभव वाळूंज म्हणाले, ‘‘गेल्या महिन्यामध्ये आंबेगाव पंचायत समितीच्या गट विकास अधिकाऱ्यांनी याप्रकरणी सखोल चौकशी केलेली आहे. त्यामध्ये काहीच तथ्य आढळून आले नव्हते. पुन्हा होणाऱ्या चौकशीला आम्ही सामोरे जाणार आहोत. सन २०१२- १३ मध्ये झालेल्या नळ पाणीपुरवठा योजनेची चौकशीची मागणी सरपंच व गावकऱ्यांनी केली आहे. त्यामुळे दिशा भरकटवण्यासाठी गावाची सुरू केलेली बदनामी ही दुर्दैवी आहे. त्यामुळे गावकऱ्यांमध्ये प्रचंड नाराजी आहे.’’