मंचर, ता.६ : ‘‘शेतकऱ्यांसाठी आंबेगाव तालुक्यात नव्याने अॅग्रीस्टॅक प्रकल्प हाती घेतला आहे. या प्रकल्पामुळे शेतकऱ्यांना शासनाच्या विविध योजनांचा लाभ जलद गतीने मिळेल. शासकीय लाभासाठी डिजिटल ओळखपत्र (फार्मर आयडी) काढून घेणे अत्यंत आवश्यक आहे. यासाठी महसूल व कृषी खाते शेतकऱ्यांना सहकार्य करत आहे,’’ असे आंबेगाव जुन्नर विभागाचे प्रांत अधिकारी गोविंद शिंदे यांनी सांगितले.
आंबेगाव तालुक्यात गावोगावी डिजिटल ओळखपत्र सुविधा शेतकऱ्यांना उपलब्ध होण्यासाठी शिबिरांचे आयोजन केले जाते. तालुक्यात एकूण ८८ हजार ४१९ शेतकरी खातेदार आहेत. त्यापैकी ३४ हजार २३० शेतकऱ्यांची फार्मर आयडी काढण्यात आली आहेत. अन्य शेतकऱ्यांनी फार्मर आयडी काढावीत, असे आवाहन तहसीलदार संजय नागटिळक व तालुका कृषी अधिकारी संदेश ढवळे यांनी केले आहे.

शेतकरी अॅपवर करू शकतात ई-पीक पाहणी
शेतकऱ्यांनी स्वतः अथवा सहायकाने शेतातल्या पिकांची नोंद ऑनलाइन पद्धतीने सातबारा उताऱ्यावर नोंदवणे यालाच ई-पीक पाहणी असे म्हटले जाते. गेल्या चार वर्षांपासून महाराष्ट्र सरकार हा उपक्रम राबवत आहे. पिकांची नोंद करण्यासाठी सगळ्यात आधी ई-पीक पाहणी हे अॅप डाऊनलोड करावे. त्यासाठी प्ले स्टोअरवर जाऊन तिथे ई पीक असे सर्च करावे. त्यानंतर इन्स्टॉलवर क्लिक करून टप्प्या टप्प्याने पुढील नोंदी कराव्यात, असे तहसीलदार डॉ.सचिन वाघ यांनी सांगितले.