मंचर, ता.३० : “कृषी उत्पन्न बाजार समितीच्या आवारात रविवारी (ता.३०) प्रती किलो मिरचीला ७० रुपये, भेंडीला ४० रुपये, फरशीला ५५ रुपये उच्चांकी बाजारभाव मिळाला. लिंबाचे दर ५० टक्क्याने उतरले आहेत. गेल्या आठवड्यात लिंबाचा दर ७० रुपये होता. सध्या ३० रुपये किलो लिंबाचा बाजारभाव झाला आहे. कांद्याचे बाजारभाव स्थिर आहेत. एकूण तीन हजार ९६१ तरकारी माल पिशव्यांची आवक झाली,” अशी माहिती आंबेगाव तालुका कृषी उत्पन्न बाजार समितीचे सभापती नीलेश (स्वामी) थोरात यांनी दिली.
आंबेगाव प्रमाणेच शिरूर व जुन्नर तालुक्यातील अनेक गावातील शेतकऱ्यांनी तरकारी माल विक्रीसाठी बाजार समितीत आणतात. रविवार ते शुक्रवार या कालावधीत दररोज दुपारी तरकारी माल व भाजीपाला खरेदी-विक्री चे व्यवहार अडत्यामार्फत सुरत, मुंबई, पुणे भागातील व्यापारी करतात. खरेदी केलेल्या तरकारीचे पैसे शेतकऱ्यांना तत्काळ देण्याची व्यवस्था येथील आडते करतात.” असे बाजार समितीचे संचालक सोमनाथ काळे व राम गावडे यांनी सांगितले.

प्रति दहा किलोचे बाजारभाव (रुपयांत) : भेंडी : १५० ते ४००, फरशी : २०० ते ५५०, पापडी : ४०० ते ५५५, पावटा : ६०० ते ६३०, राजमा : ४५० ते ६२१, वालवड : ५०० ते ५२५, लिंबू : १०० ते ३००, काकडी : १०० ते २००.

मंचर कृषी उत्पन्न बाजार समितीच्या आवारात रविवारी सात हजार ४३३ कांदा पिशव्यांची आवक झाली. प्रती क्विंटलला १६० ते १७० रुपये बाजारभाव मिळाला. यात्रा, लग्नसराई सुरू झाल्याने शेतकऱ्यांनाआर्थिक चणचण भासत आहे. त्यामुळे शेतकरी कांदा विक्रीसाठी घेऊन येत आहेत. पण अजून बाजारभाव वाढत नसल्याने कांदा उत्पादक शेतकऱ्यांची नाराजी कायम आहे. मंगळवार (ता.१ एप्रिल) रोजी कांद्यावरील २० टक्के निर्यात शुल्क हटविण्याचा निर्णय केंद्र सरकारने जाहीर केला आहे. त्यामुळे शेतकरी कांद्याचे बाजारभाव वाढण्याच्या प्रतिक्षेत आहेत.”
- गोविंद ज्ञानेश्वर खिलारी, कांदा उत्पादक शेतकरी, भराडी (आंबेगाव)