मंचर, ता. २१ : महाराष्ट्र जीन बँक व ज्ञानशक्ती विकास वाहिनी स्वयंसेवी संस्थेमार्फत सेंद्रिय शेतीचे महत्त्व प्रचार, प्रसार व दशपर्णी अर्क प्रात्यक्षिक सादरीकरण उपक्रमाचा शुभारंभ पारगावतर्फे खेड (ता. आंबेगाव) येथून केला आहे. येथे मळगंगा व भैरवनाथ या दोन महिला बचत गटाच्या अध्यक्षा अनिता पवार व सोनाली सावंत यांच्यासह एकूण ४० शेतकरी महिला सभासदांना मोफत देशी वाण (बियाणे) वाटप केले. यामध्ये तांबडा वाल, सफेद वाल, बुटकी वालवड, भेंडी, गवार, मुळा, तूर, मटकी, शेपू, डांगर व दुधी भोपळा आदि २५ प्रकारच्या वाणाचा समावेश होता. प्रकल्पांतर्गत ५५ शेतकऱ्यांना देशी भाजीपाला, तरकारी व कडधान्यांचे वाटप केले आहे. अजून ४५ शेतकऱ्यांना मोफत बियाण्यांचे वाटप करण्याची प्रक्रिया सुरु आहे .