मंचर, ता. २ : येथे शहरात बुधवारी (ता. २) सकाळी १० वाजता मोहरमनिमित्त मुस्लिम बांधवांच्या वतीने हजरत अब्बास व चौदा मासुमीन यांचा आलमे मुबारक आणि हजरत अली अजगर यांच्या झुल्याची मिरवणूक काढण्यात आली. या मिरवणुकीचा प्रारंभ पीर अवलिया दर्गा येथून झाला.
सुमारे दोन तास चाललेल्या या मिरवणुकीत एक हजारांहून अधिक मुस्लिम बांधव सहभागी झाले होते. मिरवणुकीच्या अग्रभागी मौलाना जैगम अब्बास, हुसेन ट्रान्स्पोर्टचे अध्यक्ष रहीबर मीर, राजू इनामदार आणि अल्लू इनामदार सहभागी झाले होते.
याप्रसंगी सगीर जाफरी, सर्फराज मीर, जहूर इनामदार आणि इरफान काजी यांनी पोथी पठण केले. पंजे व झुल्याची मिरवणुकीची काजीपुरा इमामबाडा येथे सांगता झाली. शुक्रवारपासून (ता. २७) मोहरमला सुरुवात झाली असून, धार्मिक विविध कार्यक्रमांचे आयोजन करण्यात येत आहे.