डी. के. वळसे पाटील : सकाळ वृत्तसेवा
मंचर, ता. ११ : मंचर (ता. आंबेगाव) पोलिस ठाण्याच्या हद्दीत गेल्या साडेचार वर्षांत महिलांच्या गळ्यातील मंगळसूत्र हिसकावून चोरून नेण्याची तब्बल २३ प्रकरणे घडली आहेत. एकूण २२ लाख ८० हजार ४६८ रुपयांचा ऐवज चोरट्यांनी लंपास केला आहे. या प्रकरणांमध्ये केवळ दोन आरोपींना अटक करण्यात मंचर पोलिसांना यश आले आहे. अजून २१ गुन्हे प्रलंबित असून, या गुन्ह्यातील आरोपी मोकाट आहेत.

मंचरमधील चोऱ्या झालेली ठिकाणे
- महात्मा गांधी विद्यालयाकडे जाणारा रस्ता.
- पिंपळगाव चौक परिसर.
- एसटी बसस्थानक.

बसमध्ये अशी करतात चोरी
गर्दीत एसटी बसमध्ये प्रवेश करताना अन्य चोरट्या महिला प्रवासी महिलेच्या सभोवती उभ्या राहून मंगळसूत्र चोरून नेतात. अशी त्यांची चोरीची पद्धत असल्याचे पोलिस तपासात निष्पन्न झाले आहे.

मंचर बसस्थानकावर मंगळसूत्र चोरीच्या घटना रोखण्यासाठी महिला पोलिसांच्या नियुक्त्या केल्या आहेत. रस्त्याने मोटारसायकलवर पोलिस गस्त घालत आहेत. महिलांनी प्रवास करताना सतर्क राहावे. एखाद्या संशयित व्यक्तीच्या हालचाली लक्षात घेऊन तातडीने ११२ क्रमांकावर संपर्क साधावा. त्यांना तत्काळ मदत मिळेल.
- श्रीकांत कंकाळ, वरिष्ठ पोलिस निरीक्षक, मंचर (ता. आंबेगाव) पोलिस ठाणे

मंचरमध्ये मंगळसूत्र चोरीचे दाखल गुन्हे
वर्ष......गुन्हे संख्या...चोरी झालेला ऐवज....परत मिळालेला ऐवज...आरोपी संख्या
२०२१ : पाच....३ लाख ७८ हजार रुपये....३० हजार रुपये....१
२०२२ : पाच....४ लाख २४ हजार ३७० रुपये, -, -
२०२३ : दोन...२ लाख ६० हजार रुपये, -, -
२०२४ : आठ...८ लाख ५९ हजार २३० रुपये...२ लाख ३० हजार रुपये...१
२०२५ : तीन....३ लाख ५८ हजार ८६८ रुपये, -, -
एकूण : २३...२२ लाख ८० हजार ४६८ रुपये...२ लाख ६० हजार रुपये....२