मंचर, ता.१९ : मंचर (ता.आंबेगाव) येथील तपनेश्वर स्मशानभूमीत अंधश्रद्धेचा पुन्हा एक धक्कादायक प्रकार समोर आला आहे. गुरुवारी (ता.१७) अंत्यविधी झालेल्या ठिकाणी रात्री अज्ञात व्यक्तीने गुलाल उधळत पूजा-विधी केल्याची घटना उघडकीस आली. विशेष म्हणजे, सीसीटीव्ही कॅमेऱ्याच्या वीजपुरवठ्याचे कनेक्शन तोडून हा प्रकार करण्यात आला आहे.
या महिन्यातील ही दुसरी घटना आहे. येथे यापूर्वीही राखेत लिंबू, नारळ, हळदीकुंकू, बांगड्या आढळून आले होते. मंचर येथील शिवसैनिक दत्तात्रेय नथू थोरात (वय ४५) यांचे बुधवारी (ता.१६) निधन झाले. त्यांचा अंत्यविधी तपनेश्वर स्मशानभूमीत गुरुवारी झाला. शुक्रवारी (ता.१८) सकाळी सावडण्याचा कार्यक्रम असल्याने थोरात कुटुंबीय, नातेवाइक व ग्रामस्थ स्मशानभूमीत आले. जिथे दत्तात्रेय थोरात यांचा अंत्यविधी झाला. तिथे चितेवर काहीतरी जळत होते. गुलालाच्या साहाय्याने रिंगण काढून हळदीकुंकू वाहत पूजा, विधी केल्याचे आढळून आले. वारंवार घडत असलेल्या या प्रकरणामुळे नागरिकांमध्ये भीतीचे वातावरण असून, उद्धव ठाकरे शिवसेना पक्षाचे जिल्हा संघटक राजाराम बाणखेले यांनी दोषींवर कारवाईची मागणी केली आहे. अन्यथा आंदोलनाचा इशारा दिला आहे.
ते म्हणाले, “हा प्रकार मंचरसारख्या प्रगतशील शहरासाठी लज्जास्पद असून अंधश्रद्धा अजूनही समाजात खोलवर रुजलेली आहे.”

13679