मंचर, ता. २ : पिंपळगाव-खडकी (ता. आंबेगाव) गावाचे शेतकरी कुटुंबातील अमोल केशव पोखरकर यांनी सैन्य दलातील २२ वर्षांची गौरवशाली सेवा पूर्ण करून निवृत्त झाले. त्यांच्या या सेवेसाठी संपूर्ण गावकऱ्यांनी एकत्र येत, सवाद्य मिरवणूक काढून त्यांच्यावर पुष्पवृष्टी केली. त्यानंतर त्यांचा गौरव करण्यात आला.
पोखरकर यांनी मराठा लाइट इन्फंट्री या प्रतिष्ठित रेजिमेंटमध्ये जबाबदारी सांभाळली. त्यांनी त्यांच्या सेवाकाळात जम्मू-काश्मीर, श्रीनगर, लडाख, बेळगाव, राजस्थान तसेच भारत-पाक सीमारेषेवर अतिदुर्गम आणि संवेदनशील भागांमध्ये कर्तव्य बजावले.
सेवानिवृत्तीनंतर प्रथमच गावात परतलेल्या पोखरकर यांचे ग्रामस्थ, युवक, वर्गमित्रांनी मिरवणूक काढून जल्लोषात स्वागत केले. पारंपरिक वाद्य, पुष्पवृष्टी आणि ‘भारत माता की जय’, ‘जय हिंद’च्या घोषणांनी संपूर्ण गावात देशभक्तीचे वातावरण निर्माण झाले होते. गावकऱ्यांच्या चेहऱ्यावर अभिमान आणि आनंद दिसत होता.
सन्मान समारंभात युवासेना कार्यकारिणी सदस्य सचिन बांगर, माजी जिल्हा परिषद सदस्य मथाजी पोखरकर, सरपंच दीपक पोखरकर, उपसरपंच अरुण बांगर, सेवानिवृत्त मुख्याध्यापक कैलास पोखरकर, हनुमंत बांगर व संकेत बांगर यांच्यासह अनेकांनी त्यांच्या लष्करी सेवेचा गौरव केला.
यावेळी आंबेगाव तालुका माजी सैनिक संघटनेचे अध्यक्ष विकास पोखरकर, धोंडिभाऊ बांगर, शरद बांगर, पूजा बांगर, मोहिनी बांगर उपस्थित होत्या. हा सोहळा पाहून त्यांचे वडील केशवराव, आई शारदा आणि पत्नी किरण यांचा आनंद द्विगुणित झाला होता.

भारत-पाकिस्तान सीमेवर कर्तव्य बजावत असताना, देशसेवेचा सार्थ अभिमान वाटत होता. आता सेवानिवृत्तीनंतर युवकांसाठी प्रेरणादायी कार्य करणार आहे. लष्करात भरती होण्यासाठी त्यांना मार्गदर्शन आणि प्रोत्साहन देणे हेच माझे पुढचे ध्येय आहे.
- अमोल पोखरकर, सेवानिवृत्त सैनिक