मंचर, ता. ११ : आंबेगाव तालुक्यात अनेक मराठा बांधव कुणबी प्रमाणपत्र मिळण्यापासून वंचित आहेत. त्यामुळे शिक्षण व नोकरीसाठी मोठ्या प्रमाणात अडचणी निर्माण होत आहे. या पार्श्वभूमीवर मराठा समाजाचे नेते मनोज जरांगे पाटील यांच्या नेतृत्वाखाली मुंबईत झालेल्या आंदोलनाची दखल घेऊन राज्य शासनाने शासन निर्णय काढून गाव पातळीवर समिती गठीत करण्याचे आदेश दिले आहे. या आदेशाची त्वरित कार्यवाही करावी, अशी मागणी अखिल भारतीय मराठा महासंघाचे पुणे जिल्हा अध्यक्ष अंकुशराव लांडे यांनी केली.
याबाबत घोडेगाव (ता. आंबेगाव) येथे गुरुवारी (ता. ११) लांडे यांच्या नेतृत्वाखाली गणेश खानदेशे, अशोकराव काळे, आशिष घोलप, भानुदास काळे, सरपंच संगीता शेवाळे, योगेश हुले, रूपेश मोरडे, अजय मुळूक, सुरेखा निघोट, कचर गव्हाणे, दिलीप चासकर यांनी मागण्यांचे निवेदन आंबेगावचे तहसीलदार संजय नागटिळक यांना दिले.
यावेळी ‘एक मराठा, लाख मराठा’ अशा घोषणा देण्यात आल्या. कुणबी-मराठा, कुणबी किंवा मराठा, कुणबी- मराठा जातीचे प्रमाणपत्र देण्याबाबत राज्य शासनाने अटी व शर्ती मंजूर केलेल्या आहेत. आंबेगाव तालुक्यात मराठा बांधवांची संख्या मोठ्या प्रमाणात आहे. मराठा समाजातील व्यक्तींना प्रमाणपत्र देण्यासंदर्भात चौकशी करून सक्षम अधिकाऱ्यांसह गावपातळीवर समित्या गठित कराव्यात. शासन निर्णयानुसार समितीमधील सदस्यांसाठी प्रशिक्षण सत्र व कार्यशाळा आयोजित कराव्यात, असे निवेदनात नमूद केले आहे.
दरम्यान, निवेदनाप्रमाणे कार्यवाही करण्याबाबत वरिष्ठांसमवेत चर्चा करून निर्णय घेतला जाईल, असे तहसीलदार नागटिळक यांनी सांगितले.