मंचर, ता. १ : बांधकाम व्यवसायिक रमेश येवले यांनी गणेशवाडी- शेवाळवाडी (ता. आंबेगाव) येथील श्री गणेश मंदिराच्या उर्वरित बांधकामासाठी एक लाख ५१ हजार रुपये रोख देणगी शिवशक्ती गणेश प्रतिष्ठानचे संस्थापक-अध्यक्ष शशिकांत बढे यांच्याकडे सुपूर्त केली.
हनुमंत महाराज गंगथडे (श्री क्षेत्र आळंदी) यांचे कीर्तन सुरु असताना त्यांनी उपस्थित भाविक व ग्रामस्थांना श्री गणेश मंदिराच्या बांधकामासाठी मदतीचे आवाहन केले होते. यावेळी उपस्थित असलेले रमेश येवले यांनी उस्फूर्तपणे देणगीची घोषणा केली होती. त्यांनी प्रत्यक्ष मंदिर परिसरात येऊन ती रक्कम सुपूर्त केली. त्यांचा फेटा बांधून शाल, श्रीफळ, पुष्पगुच्छ व श्रीगणेशमूर्ती देऊन सत्कार केला.
येवले म्हणाले, ‘‘धार्मिक, सामाजिक, शैक्षणिक व आरोग्य क्षेत्रासाठी वेळोवेळी मदत करण्याचे भाग्य मला मिळाले आहे. या मंदिराचे काम लवकर पूर्ण होण्यासाठी सर्वांनी मदत करावी.’’
यावेळी योगेश थोरात यांनी श्री गणेश मंदिरासाठी एक लाख रुपये देणगी जाहीर केली. त्यांचाही सन्मान करण्यात आला.
यावेळी सरपंच माधुरी शेटे, उपसरपंच मेघा चिखले, अमोल थोरात उपस्थित होते.
MAC25B14232