मंचर, ता. ८ : लांडेवाडी (ता. आंबेगाव) येथील श्री भैरवनाथ शिक्षण प्रसारक मंडळाच्या वतीने श्री शिवाजीराव आढळराव पाटील सभागृहात सोमवारी (ता. ६) कोजागरी पौर्णिमेनिमित्त सांस्कृतिक कार्यक्रम पार पडला. यामध्ये शिक्षकांनी उस्फूर्तपणे सहभाग घेतला होता.
दररोज विद्यार्थ्यांना शिक्षणाचे धडे देणारे शिक्षकच कलाकार म्हणून व्यासपीठावर आल्यानंतर उपस्थित विद्यार्थी व पालकांनी टाळ्यांचा कडकडाट केला. जुन्या, नव्या हिंदी, मराठी गीतांचे सादरीकरण, समूह नृत्य, विनोद, कविता, बासरी वादन व उत्कृष्ट वेशभूषा आदी सादरीकरण पाहून उपस्थित मंत्रमुग्ध झाले होते. म्हाडाचे अध्यक्ष शिवाजीराव आढळराव पाटील, प्रशासन अधिकारी श्यामल चौधरी यांनी कलाकारांचे कौतुक केले. याप्रसंगी राजू आढळराव, शबनम मोमीन, रजनी बाणखेले, संजय चौधरी, बिपिन बनकर, सुनील गावशेते आदी उपस्थित होते. प्रफुल्ल लोंढे व स्नेहा सिंग यांनी सूत्रसंचालन केले.