मंचर, ता.१० : अवसरी खुर्द (ता. आंबेगावगाव) येथील कौलीमळा परिसरात दोन पूर्ण वाढ झालेले बिबटे मुक्तपणे फिरताना दिसल्याने ग्रामस्थांमध्ये भीतीचे वातावरण निर्माण झाले आहे. गुरुवारी (दि.९) रात्री सात वाजता सुधीर दत्तात्रेय भोर हे ट्रॅक्टर चालवत असताना ट्रॅक्टरच्या प्रकाशामध्ये हे दोन्ही बिबटे फिरताना दिसले. त्यांनी तत्काळ त्यांचा व्हिडिओ मोबाइलमध्ये चित्रित केला. मंचर वनपरिक्षेत्र अधिकारी विकास भोसले म्हणाले की, अवसरी खुर्द परिसरात बिबट्यांचा वावर वाढला आहे. लवकरच कौलीमळा येथे पिंजरा लावण्यात येईल, नागरिकांनी लहान मुले व महिलांनी काळजी घ्यावी. याबाबत वन खात्यामार्फत जनजागृती सुरू असल्याचे सांगितले