मंचर, ता. ९ : मंचर (ता. आंबेगाव) नगरपंचायत निवडणुकीसाठी आचारसंहिता मंगळवारपासून (ता. ४) लागू झाल्याने शहरातील सर्व फ्लेक्स, बॅनर्स काढून टाकण्यात आले आहेत. नावफलक व कोनशिला झाकण्यात आल्या आहेत. विनापरवाना पत्रके, फ्लेक्स लावणाऱ्यांवर कडक कारवाई होणार आहे. मतदारांना रक्कम वाटप, प्रलोभने देणे, धाकदपटशा दाखवणे यावर तत्काळ फौजदारी कारवाई करण्यात येणार आहे.सोमवार (ता.१०) पासून उमेदवारी अर्ज स्वीकारण्यास सुरुवात होणार आहे. सर्वांनी आचारसंहितेची काटेकोरपणे अंमलबजावणी करावी. प्रशासनाने निवडणुकीची जय्यत तयारी केली आहे, अशी माहिती नगर पंचायतीच्या निवडणूक निर्णय अधिकारी अंजली कुलकर्णी यांनी दिली.
मंचर नगरपंचायत कार्यालयात निवडणुकीसंदर्भात झालेल्या बैठकीला सहाय्यक निवडणूक निर्णय अधिकारी गोविंद जाधव, वरिष्ठ पोलिस निरीक्षक श्रीकांत कंकाळ तसेच विविध पक्षांचे पदाधिकारी उपस्थित होते.