मंचर, ता.२० : अवसरी खुर्द-कौलीमळा (ता.आंबेगाव) येथील रवींद्र वाळके यांच्या घराजवळ वनखात्याने बिबट्याला जेरबंद करण्यासाठी पिंजरा लावला आहे. त्यांच्या घराच्या आवारात तीन बिबट्यांनी फेर फटाका मारून काही वेळ बैठक मारली होती. हे दृश्य सीसीटीव्ही कॅमेऱ्यात मंगळवारी (ता.१८) पहाटे तीन वाजता कैद झाले होते.
दरम्यान, याच वस्तीत विनय शिंदे यांच्या शीतल पोल्ट्री फार्मजवळ बिबटे आले होते. या घटनेमुळे परिसरात दहशतीचे व भीतीचे वातावरण निर्माण झाले होते. नागरिकांनी पिंजरा लावण्याची मागणी केली होती. मंचर वनपरिक्षेत्र अधिकारी विकास भोसले यांच्यासह बिबट शीघ्र कृती दल गावडेवाडी, वनरक्षक एस.के. ढोले यांनी घटनास्थळी भेट देवून पाहणी केली. गुरुवारी (ता.२०) पिंजरा लावला आहे.

14606