मंचर, ता. १८ : आंबेगाव तालुक्यातील भोरवाडी-अवसरी खुर्द येथे शिवसम्राट युवा प्रतिष्ठानच्या मोफत सामुदायिक विवाह सोहळ्यांना शासनाचे पाठबळ मिळाले आहे. २०२३ व २०२४ मधील एकूण १९ वधूंना ३ लाख ८० हजार रुपयांचे अनुदान थेट बँक खात्यात जमा झाल्याची माहिती शिव सम्राट प्रतिष्ठानचे अध्यक्ष किरण भोर, विकास भोर यांनी दिली.
सन २०२३ मधील विवाह सोहळ्यातील ९ वधूंना प्रत्येकी १० हजार रुपये, तर २०२४ मधील १० वधूंना प्रत्येकी २५ हजार रुपये असे अनुदान देण्यात आले. या उपक्रमामुळे आर्थिकदृष्ट्या दुर्बल कुटुंबांना दिलासा मिळाला असून सामुदायिक विवाह सोहळ्यांची चळवळ अधिक बळकट होत आहे.
शिवसम्राट युवा प्रतिष्ठानतर्फे १७ वर्षांपासून मोफत सामुदायिक विवाह सोहळे घेतले जातात. या उपक्रमामुळे विवाहातील अनाठायी खर्च टाळला जाऊन साधेपणाने व सामाजिक ऐक्य जपत विवाह पार पाडले जात आहेत.