मंचर, ता. ३ : मंचर ते अवसरी खुर्दचे शासकीय अभियांत्रिकी महाविद्यालय या मार्गावर मंचर नगरपंचायतीच्या वतीने बसविण्यात आलेले ४० पथदिवे गेल्या दोन महिन्यांपासून बंद आहेत. परिणामी, रात्रीच्या वेळी या मार्गावरून प्रवास करताना विद्यार्थ्यांना तसेच अवसरी खुर्द, पिंपळगाव परिसरातील नागरिकांना जीव मुठीत धरून जावे लागते.
या रस्त्याच्या दोन्ही बाजूंना उसाची शेती अन् दाट झाडी असल्याने बिबटे, कोल्हे व लांडगे यांचा वावर कायम असतो. पूर्वी पथदिवे सुरू असल्याने हा परिसर नागरिकांना सुरक्षित वाटत होता. मात्र, दिवे बंद पडल्याने अंधाराचे साम्राज्य निर्माण झाले असून भीतीचे वातावरण आहे.
विद्यार्थी अन् पालकांची गैरसोय
अवसरी खुर्द येथील शासकीय अभियांत्रिकी महाविद्यालयात देशभरातून विद्यार्थी शिक्षणासाठी येतात. तसेच, त्यांना भेटण्यासाठी अनेक पालक रात्री ये-जा करतात. काही वेळा मंचरवरून वाहनांची सोय नसल्याने पालकांना पायी प्रवास करावा लागतो. अशा परिस्थितीत बंद पथदिव्यांमुळे अपघात व वन्यप्राण्यांच्या हल्ल्याचा धोका वाढला आहे. नगरपंचायतीने या समस्येकडे तातडीने लक्ष देऊन ते दुरुस्त करावेत, अशी मागणी विद्यार्थ्यांसह स्थानिकांनी केली आहे.