मंचर, ता.२७ : आंबेगाव तालुक्यातील अवसरी खुर्द-कौलीमळा परिसरात मंचर वनपरिक्षेत्र कार्यालयाने लावलेल्या पिंजऱ्यात रविवारी (ता. २६) रात्री एक वर्षाचा बिबट्या जेरबंद झाला. जानेवारी महिन्यात याच ठिकाणी लावलेल्या पिंजऱ्यात बिबट्या जेरबंद झाला होता. गेल्या काही दिवसांपासून या परिसरात सहा बिबट्यांचा वावर सीसीटीव्हीमध्ये आढळत होता. त्यामुळे नागरिकांमध्ये भीतीचे वातावरण निर्माण झाले होते.
कौलीमळा येथील शेतकरी सुलोचना वाळके यांच्या घराशेजारी गेल्या साडेचार महिन्यांत तब्बल सहा वेळा बिबट्यांचा वावर सीसीटीव्हीत कैद झाला आहे. २२ फेब्रुवारीला मध्यरात्रीच्या सुमारास बिबट्या घराच्या आवारात, अंगण व पायरीपर्यंत येऊन गेला होता. त्यानंतर २४ मार्चला दोन बिबटे रात्री साडेनऊच्या सुमारास परिसरात दिसले होते. तसेच पहाटेच्या सुमारास ते घराशेजारून जातानाही कॅमेऱ्यात दिसले. या पार्श्वभूमीवर वन विभागाने पुन्हा पिंजरा लावला होता. अखेर रविवारी रात्री दुसरा बिबट्या जेरबंद झाला. स्थानिक नागरिकांनीही पिंजरा टेम्पोमध्ये चढवण्यासाठी मदत केली.

अवसरी खुर्द परिसरातील नागरिकांनी रात्रीच्या वेळी सतर्क राहावे. घराबाहेर पडताना बॅटरी, काठी किंवा घुंगरू लावलेली काठी सोबत ठेवावी. बिबट्याची चाहूल लागताच घाबरून न जाता तत्काळ वन विभागाशी संपर्क साधावा. वनखात्याच्या कर्मचारी वर्गाकडून रात्री या भागात गस्त सुरू केली आहे.
- विकास भोसले, वनपरिक्षेत्र अधिकारी, मंचर (ता. आंबेगाव)