मंचर, ता. २२ : श्री क्षेत्र वडगाव काशिंबेग (ता. आंबेगाव) येथे गणेश फेस्टिव्हल २०२६निमित्त आयोजित बैलगाडा शर्यतीचा प्रारंभ रविवारी (ता. २०) झाला. गुरुवारी (ता. २४) फेस्टिव्हलची सांगता होणार आहे. तालुक्यातील सर्वात मोठी बैलगाडा शर्यत असून ९०१ बैलगाडा मालकांनी नाव नोंदणी केली आहे. रविवारी व सोमवारी ३२० बैलगाडे धावताना उपस्थितांनी टाळ्या वाजवून दाद दिली. घाटाचा राजा हा किताब हॉटेल मयूर रामशेठ बाबुराव थोरात यांच्या बैलगाड्याला देण्यात आला.
रविवारी अर्धपीठ गणपती मंदिरापासून निशाणाची मिरवणूक काढण्यात आली. त्यानंतर शर्यतीचा प्रारंभ झाला. जितेंद्र बबनराव लोंढे यांचा बैलगाडा फळीफोड ठरला. द्वितीय क्रमांकाची फळी देवांश विक्रांत शेवाळे तर तृतीय क्रमांकाची फळी मंगेश भगवान मुळे यांच्या बैलगाड्यांनी फोडली. सोमवारी मंचर येथील राजवीर नितीन थोरात यांच्या बैलगाड्याने प्रथम क्रमांकाची फळी फोडली. द्वितीय क्रमांकात पार्थ ऋतिक राजगुरव तर तृतीय क्रमांकात संतोष बबन कोंडे यांचे बैलगाडे फळीफोड ठरले.
प्रथम क्रमांकातील विजेत्या बैलगाड्यांची सायंकाळी फायनल शर्यत झाली. या शर्यतीने रंगत आणली. शिवसेना नेते रमेश येवले, कुलस्वामी पतसंस्थेचे अध्यक्ष शंकर पिंगळे यांनी बैलगाडा मालकांना शुभेच्छा दिल्या. शर्यती पाहण्यासाठी पंचक्रोशीतील नागरिक मोठ्या संख्येने उपस्थित होते.