माळेगाव, ता. २३ ः अॅग्रीकल्चरल डेव्हलपमेंट ट्रस्ट, बारामती संचलित माळेगाव कृषी विज्ञान केंद्रामध्ये गुरुवारी (ता.२३) जागतिक मधमाशी दिवस साजरा करण्यात आला. यानिमित्ताने शेतकऱ्यांना मधमाशीच्या विविध जाती, मधमाशीचे परागीभवनात महत्त्व, मध आणि मधाचे विविध पदार्थ व त्यांच्या प्रक्रियेला चालना देण्यासाठी प्रधानमंत्री सुक्ष्म अन्न पदार्थ उद्योग योजनेबाबत माहिती दिली.
तसेच मधमाशांचे कीड व रोग आणि त्यांचे व्यवस्थापन अशा विविध विषयांवरही तज्ज्ञांकडून मार्गदर्शन झाले. या कार्यक्रमाचे उद्‌घाटन कृषी विज्ञान केंद्राचे प्रमुख डॉ. धीरज शिंदे यांच्या हस्ते झाले. यावेळी डाॅ. शिंदे यांनी कृषी क्षेत्रात मधमाशीचे अनन्य साधारण महत्त्व असल्याचे सांगितले. तसेच त्यांनी रोजगार निर्मितीसाठी मधुमक्षिका पालन हे कशा पद्धतीने उपयोगी ठरेल, याची विस्तृत माहिती शेतकऱ्यांना दिली. प्रशिक्षण समन्वयक प्रशांत गावडे यांनी मधमाशी पासून मिळणारे विविध उत्पादनाची माहिती देत उत्पादनांचे विक्री व्यवस्थापन उपस्थितांना समजून सांगितले. प्रात्यक्षिकांसहित मधमाशीची योग्य हाताळणी, नैसर्गिक पद्धतीने शुद्ध मधाची काढणी, जागतिक बाजारपेठेत मधमाशीपासून मिळणाऱ्या पदार्थांचे महत्त्व आदी विषयांच्या आधारे डॉ.मिलिंद जोशी, अल्पेश वाघ, सचिन क्षीरसागर, संतोष गोडसे यांनी मार्गदर्शन केले.