माळेगाव, ता. १० : ॲग्रिकल्चरल डेव्हलपमेंट ट्रस्ट, बारामती संचलित स्कूल ऑफ फार्मसी ॲण्ड रिसर्च सेंटरला डॉक्टरेट ऑफ फार्मसी (फार्म. डी.) या अभ्यासक्रमास मान्यता मिळाली आहे. संस्थेस उच्च व तंत्र शिक्षण विभाग महाराष्ट्र शासन, फार्मसी कौन्सिल ऑफ इंडिया, नवी दिल्ली व डॉ. बाबासाहेब आंबेडकर तंत्र शिक्षण विद्यापीठ लोणेरे, रायगड यांच्याकडून सर्व मूल्यमापन करून डॉक्टर ऑफ फार्मसी या उच्च दर्जाच्या अभ्यासक्रमासाठी अधिकृत मान्यता प्राप्त झाली आहे.
‘‘यामुळे बारामतीसह संपूर्ण ग्रामीण भागातील विद्यार्थ्यांना फार्मसी क्षेत्रातील सर्वात प्रगत, आंतरराष्ट्रीय स्तरावर मान्यता प्राप्त व रोजगाराभिमुख अभ्यासक्रम स्थानिक पातळीवरच शिकण्याची सुवर्णसंधी प्राप्त झाली आहे,’’ अशी माहिती संस्थेचे सीईओ नीलेश नलावडे यांनी दिली. हा सहा वर्षांचा अभ्यासक्रम असून त्यात पाच वर्षांचे प्रयोगात्मक शिक्षण आणि एक वर्ष रुग्णालयातील प्रत्यक्ष इंटर्नशिप यांचा समावेश आहे. या अभ्यासक्रमातून विद्यार्थ्यांना हॉस्पिटल फार्मसी, क्लिनिकल रिसर्च, फार्माकोव्हिजिलन्स यांसारख्या क्षेत्रात तसेच आंतरराष्ट्रीय करिअरच्या संधी प्राप्त होतात.
या अभ्यासक्रमासाठी बारावी (विज्ञान शाखा) उत्तीर्ण विद्यार्थी पात्र आहेत. प्रवेश प्रक्रियेसाठी महाराष्ट्र सीईटी सेल मान्यता प्राप्त स्क्रूटिनी सेंटर म्हणून स्कूल ऑफ फार्मसी ॲण्ड रिसर्च सेंटर, बारामती कार्यरत आहे. प्रवेश घेण्यासाठी इच्छुक विद्यार्थ्यांनी तत्काळ स्क्रूटिनी सेंटरला भेट देऊन प्रवेश अर्ज सादर करावा, असे आवाहन फार्मसी विभाग प्रमुख प्रा. सागर शिंदे यांनी केले आहे.

फार्म. डी. कोर्स म्हणजे क्लिनिकल फार्मसी, रुग्ण सेवा, औषध परिणाम अभ्यास आणि औषध संशोधन यामधील प्रत्यक्ष प्रशिक्षण देणारा एक अत्याधुनिक अभ्यासक्रम आहे. बारामतीमध्ये असा अभ्यासक्रम सुरू होणे, ही अत्यंत अभिमानास्पद बाब आहे. ग्रामीण भागातील विद्यार्थ्यांनी या अभ्यासक्रमाचा लाभ घेऊन नावीन्यपूर्ण संशोधन आणि जागतिक आरोग्यसेवेच्या क्षेत्रात आपले स्थान निर्माण करावे. भारतीय औषध संशोधन क्षेत्र जगभरात वेगाने विस्तारत असून त्यात भर घालणारे विद्यार्थी याच मातीतून घडावेत, हीच आमची अपेक्षा आहे.
- राजेंद्र पवार, ॲग्रिकल्चर डेव्हलपमेंट ट्रस्ट संस्था प्रमुख