माळेगाव, ता. ४ : ‘‘बारामती विधानसभा पोटनिवडणूक पुर्णतः भावनिक आहे. अजितदादांचे अकाली निधन झाले. अद्याप बारामतीकर दुःखातून सावरले नाहीत. त्यामुळे ही निवडणूक बिनविरोध व्हावी, हे पवारसाहेबांपासून सर्वांना वाटते. काँग्रेस पक्षाकडून बारामतीत उमेदवारी देण्याबाबत वेगवेगळ्या प्रतिक्रिया येत आहेत. तरीही बिनविरोधसाठी आम्ही विविध पक्षांच्या नेते मंडळींना विनंती करणार आहे. परंतु, जर निवडणूक झालीच, तर बारामतीकर नक्कीच अजितदादादांचे कार्य डोळ्यासमोर ठेवून आमच्या पाठीशी उभे राहतील,’’ असा विश्वास राष्ट्रवादी काॅंग्रेसचे युवा नेते जय अजित पवार यांनी व्यक्त केला.
बारामतीमधील पणदरे पंचक्रोशीमध्ये बुधवारी (ता. १) गारपीट झाली. येथील नुकसानग्रस्त शेतकऱ्यांच्या शिवारात शनिवारी जय पवार यांनी भेटी दिल्या. त्यावेळी ते पत्रकारांशी बोलत होते. ‘ऊस, केळी, डाळिंब, कलिंगड, गहू आदी चारा पिकांचे गारपिटीने नुकसान झाले. त्या नुकसान रकमेच्या तुलनेत शासनाकडून मदत व्हावी,’ अशी मागणी गणेश मुळीक, रोहन जगताप, संजय जगताप आदी बाधित शेतकऱ्यांनी केली. यावर जय पवार म्हणाले, ‘‘शेतकऱ्यांच्या पाठीशी सरकार आणि पवार कुटुंबीय आहे. उपमुख्यमंत्री सुनेत्रावहिनी यांनी नुकसानग्रस्त शेतकऱ्यांच्या शिवारातील पिकांचे पंचनामे करण्यास प्रशासनाला सांगितले आहेत. त्यानुसार पंचनाम्याचे काम अंतिम टप्प्यात आहे. नुकसानीच्या तुलनेत आर्थिक मदत अधिकची होण्याबाबत वहिनीसाहेब, कृषिमंत्री दत्तात्रेय भरणे, पुण्याचे आयुक्त आणि स्थानिक पदाधिकाऱ्यांची एकत्रित बैठक घेण्याचे मी नियोजन करीत आहे.’’

अजितदादा आपल्यातून जाणे आणि निवडणुकीचा हा प्रसंग आपल्या पुढे येईल, हे कोणालाच वाटत नव्हते. परंतु, दुर्दैवाने या प्रसंगाला सामोरे जावे लागत आहे. सोमवारी सुनेत्रावहिनींचा अर्ज भरला जाणार आहे. राष्ट्रवादीचे ज्येष्ठ नेते प्रफुल्ल पटेल, सुनील तटकरे, छगन भुजबळ आदी नेतेमंडळी अर्ज भरण्यासाठी येणार आहेत. त्याच बरोबर मुख्यमंत्री देवेंद्र फडणवीस, उपमुख्यमंत्री एकनाथ शिंदे आदींनाही निमंत्रित केले आहे.
- जय पवार