माले, ता. २२ : माले (ता. मुळशी) येथील घाटामध्‍ये पुणे- कोलाड रस्‍त्‍याच्‍या कडेला एका बास्केटमध्ये सात महिन्यांची मुलगी आढळून आली.
पोलिसांनी दिलेल्या माहितीनुसार, माले येथील हॉटेल फोर सीजनसमोर रस्त्याच्या कडेला जाळीच्या गुलाबी बास्केटमध्ये एक चिमुकली मुलगी ठेवलेली असल्याचे स्थानिक रहिवासी रेखा वाल्हेकर व समीर वाल्हेकर यांच्या मंगळवारी (ता. २१) पहाटेच्या सुमारास निदर्शनास आले. त्यांनी तत्काळ गावातील नागरिकांच्या मदतीने याबाबतची माहिती पौड पोलिस ठाण्याला दिली. घटनेची माहिती मिळताच पोलिस निरीक्षक संतोष गिरीगोसावी यांच्या मार्गदर्शनाखाली पोलिस हवालदार महेश पवार, अनिता रवळेकर व राजकुमारी हरिश्चंद्रे यांनी घटनास्थळी धाव घेतली. संबंधित मुलीला ताब्यात घेऊन तिची वैद्यकीय तपासणी केली. त्यानंतर पुढील देखभालीसाठी तिला निगडी येथील आधार संस्था केंद्रात दाखल केले. या मुलीबाबत काही माहिती असल्यास संपर्क साधण्याचे आवाहन पौड पोलिसांनी केले आहे.