मांजरी खुर्द, ता. १ : येथील बनावट ग्रामसभा प्रकरणी गुन्हा दाखल असलेल्या आरोपींनी जामीन मिळण्यासाठी अतिरिक्त जिल्हा व सत्र न्यायालयाकडे अर्ज केला होता. न्यायालयाने हा जामीन अर्ज फेटाळला आहे.
मांजरी खुर्द (ता. हवेली) ग्रामपंचायतीमध्ये बोगस व बनावट ग्रामसभा दाखवून एका संस्थेची मिळकत, तसेच एक हेक्टर सरकारी गावठाण जमीन बळकावल्याप्रकरणी संदीप उंद्रे यांनी उच्च न्यायालयाकडे तक्रार केली होती. न्यायालयाने त्याची दखल घेत या प्रकरणातील एकूण नऊ आरोपींविरुद्ध गुन्हा दाखल करण्याचे आदेश दिले होते. त्यानुसार वाघोली पोलिस ठाण्यात गुन्हा दाखल केला आहे.
या गुन्ह्यातील मुख्य आरोपी रोहिदास दामोदर उंद्रे यांच्यासह इतरांनी अतिरिक्त जिल्हा व सत्र न्यायालयात जामीन अर्ज दाखल केला होता. हा जामीन अर्ज फेटाळण्याबाबत वाघोली पोलिस ठाण्याच्या वतीने सरकारी वकिलांनी युक्तिवाद
केला होता. आरोपी तसेच, सरकारी पक्षाचा युक्तिवाद ऐकून न्यायालयाने आरोपी रोहिदास दामोदर उंद्रे, तसेच ग्रामपंचायत कर्मचारी रामदास शिवराम उंद्रे व विठ्ठल सुभाष सावंत यांचा जामीन अर्ज फेटाळला आहे.
आरोपी यांच्या विरुद्धच्या आरोपांकडे पाहता, त्यांची भूमिका प्रथमदर्शनी मोठी आणि गंभीर दिसते. त्यामुळे तपशीलवार चौकशी करण्यासाठी त्यांची कोठडीतील चौकशी आवश्यक असल्याचे सांगत जामीन अर्ज फेटाळला.
सत्ता, पैसा व राजकीय दबाव निर्माण करून घोटाळे करणाऱ्या पुढाऱ्यांना कायद्याची जरब बसणे आवश्यक होते. सत्र न्यायालयाने अत्यंत महत्त्वपूर्ण निरीक्षण नोंदवून आरोपींचा अटकपूर्व जामीन फेटाळला आहे. पोलिसांनी तत्काळ आरोपींना अटक करून न्यायालयाच्या आदेशाचे पालन करावे, अशी मागणी तक्रारदार उंद्रे यांनी केली आहे.