मोरगाव, ता. ९ : लोणी भापकर (ता.बारामती) येथील विविध क्षेत्रात काम करणाऱ्या युवकांनी मिळून सुपर ट्रेकर्स ग्रुप सुरू केला आहे. या ग्रुपने मैत्री दिनाचे औचित्य साधून रविवारी (ता.६) प्राथमिक आरोग्य केंद्राजवळ आठ ते दहा फूट उंचीच्या रोपांची लागवड केली.
पर्यावरण पूरक काम करण्याचा तसेच वाढदिवसावरील अनावश्यक खर्च टाळून वृक्षारोपण करण्याची चळवळ ग्रुपने राबविली आहे. ''गड किल्ले पर्यावरण संवर्धनम''हे ब्रीद वाक्य घेऊन सुपर ट्रेकर्स ग्रुप काम करत असून, यापूर्वी रायरेश्वर, राजगड, तोरणा, विचित्रगड, रायगड अशा पाच किल्ल्यांवर ग्रुपच्या सदस्यांनी
स्वच्छता मोहीम राबविली आहे. दरम्यान, लोणी भापकर येथील प्राथमिक शाळेच्या आवारात पावसाळ्यामुळे वाढलेले गवत काढले व विद्यार्थ्यांना होणारा डासांचा प्रादुर्भाव टाळण्यासाठी गवतावर तणनाशकाची फवारणी केली. यापुढील काळातही कमी तिथे आम्ही या भूमिकेतून गावामध्ये गरज असलेली कामे ग्रुपच्या माध्यमातून करण्यात येणार असल्याची माहिती सुपर ट्रेकर्स ग्रुप कडून देण्यात आले.
वृक्षारोपण केलेल्या ठिकाणी वृक्ष संवर्धनाचे नियोजनही ग्रुपकडून करण्यात येत आहे.
60290