मोरगाव, ता.२८ : जोगवडी (ता.बारामती) या टंचाईग्रस्त गावात नुकताच सोमेश्वर कारखान्याचे माजी अध्यक्ष व विद्यमान संचालक राजवर्धन शिंदे यांनी भेट दिली. येथील पाण्याची परिस्थिती, तोडणीला आलेल्या उसाची सद्यस्थिती तसेच विविध समस्यांची पाहणी केली.
जोगवडी येथील मोडकळीस आलेल्या भैरवनाथ मंदिराला भेट देत मदत करण्याचे आश्वासन दिले. तसेच दुष्काळ जाहीर झालेल्या गावांतून लवकर ऊसतोड केली जाईल, अशी ग्वाही शेतकऱ्यांना दिली. वास्तविक, सोमेश्वर साखर कारखान्याचे कार्यक्षेत्रजवळ असल्यामुळे मोरगाव, मुर्टी, जोगवडी, आंबी यासह या भागामधील असंख्य शेतकऱ्यांनी उसाचे उत्पादन मोठ्या प्रमाणावर घेतले आहे. मात्र, पावसाने दिलेल्या ओढीमुळे विहिरींच्या पाण्याची पातळी खालावली आहे. त्यामुळे मोठ्या काटकसरीने आणलेले उसाचे पीक अडचणीत आले असून, पुढील पाणी उसाला न मिळाल्यास चांगला आलेला ऊस वाळून जाऊन वजनात घट होऊन शेतकऱ्यांचे नुकसान होण्याची शक्यता निर्माण झाली आहे. त्यामुळे कारखान्याने टंचाईग्रस्त परिस्थितीच्या पाहणीचा विचार करून तोडणीला आलेला ऊस वेळेमध्ये तोडून घ्यावा, अशी शेतकऱ्यांची मागणी होती. या मागणीचा विचार करून कारखान्याचे शिंदे यांनी जोगवडीसह या परिसरातील टंचाईग्रस्त गावांची पाहणी केली व टंचाईग्रस्त ठिकाणचे लवकरच नेण्याचे प्रयत्न राहतील, असे यावेळी शिंदे यांनी सांगितले. यावेळी त्यांच्या ऊस उत्पादक शेतकरी सुनील राजे भोसले व इतर शेतकरी उपस्थित होते.