मोरगाव, ता. २२ : ‘‘शेती आणि शेतीपूरक व्यवसायातून विकास साधण्यासाठी शेतकऱ्यांनी कृषी विभागाच्या अनुदान तत्त्वावरील योजनांचा लाभ घ्यावा व आधुनिक तंत्रज्ञान वापरावे,’’ असे आवाहन बारामती तालुक्याचे तालुका कृषी अधिकारी सचिन हाके यांनी केले.

सायंबाचीवाडी (ता.बारामती) येथे खरीप हंगामाच्या पार्श्वभूमीवर पीक प्रशिक्षण कार्यक्रमात शेतकऱ्यांशी संवाद साधताना ते बोलत होते. हाके व सुप्याचे मंडल कृषी अधिकारी चंद्रकांत मासाळ यांच्या मार्गदर्शनाखाली खरीप हंगाम मोहीम अंतर्गत प्रमुख पीक प्रशिक्षण हा कार्यक्रम घेण्यात आला. यावेळी उप कृषी अधिकारी बापूराव लोधाडे यांनी मूग पीक लागवडी विषयी सखोल मार्गदर्शन केले . मुगाचे उत्पादन वाढविण्यासाठी जमिनीची मशागत, पेरणी त्यानंतर, पाण्याच्या वेळा, खतांची योग्य मात्रा यावर लोधाडे यांनी शेतकऱ्यांना मार्गदर्शन केले.
शेतकऱ्यांना मार्गदर्शन करताना यावेळी तालुका कृषी अधिकारी हाके यांनी कृषी विभागातील विविध योजना विषयी शेतकऱ्यांना माहिती दिली. जमिनीची प्रतवारी यासह पाण्याची उपलब्धता व पूरक वातावरण याचा विचार करून शेतकऱ्यांनी कृषी विभागाच्या योजनांचा ऑनलाइन प्रक्रियेत सहभाग घेऊन लाभ घ्यावा.

सहाय्यक कृषी अधिकारी तृप्ती गुंड यांनी बीज प्रक्रिया व बियाणे उगवण क्षमता तपासणी चाचणी याविषयी माहिती दिली. कार्यक्रमास सरपंच जालिंदर भापकर तसेच सदस्य तसेच शेतकरी उपस्थित होते. यावेळी हाके यांच्या हस्ते मूग बियाणे वाटप करण्यात आले.
बापूराव लोधाडे यांनी कार्यक्रमाचे नियोजन केले होते.