मोरगाव, ता. ७ : राष्ट्रीय अन्न सुरक्षा योजनेअंतर्गत धान्य वितरित होणाऱ्या लाभार्थ्यांचे ई- केवायसी केल्याशिवाय त्यांना धान्य देण्यात येऊ नये, अशा सूचना बारामतीचे तहसीलदार गणेश शिंदे यांनी तालुक्यातील सर्व स्वस्त धान्य दुकानदार यांना एका लेखी पत्राद्वारे दिल्या आहेत.
या योजनेतून धान्य घेणाऱ्या सर्व लाभाथ्यांची केवाईसी प्रमाणीकरण करण्याच्या सूचना केंद्र शासनाने दिल्या आहेत. राष्ट्रीय अन्न सुरक्षा योजना लाभार्थ्यांचे १०० टक्के ई केवायसी प्रमाणिकरण करण्याची मुदत १५ मे २०२५ पर्यंत दिली होती. मात्र, १०० टक्के ई केवायसी प्रमाणिकरण झाले नाही.
शिधापत्रिकांमध्ये ज्या लाभाथ्यांचे आधार क्रमांक आहेत, तेच लाभार्थी या अन्नधान्याचा व केंद्र शासनाच्या योजनेचा लाभ घेत आहेत. याची खात्री करण्यासाठी ई- केवायसी केले जात आहे. याशिवाय शिधापत्रिकेमध्ये नमूद आधार त्याच व्यक्तीचे असल्याची खात्री करून घेतली जात असून, भविष्यकाळात हे प्रमाणीकरण नसलेल्या लाभार्थ्यांचे धान्य बंद करण्यात येणार आहे.
यापूर्वी ग्रामपंचायत, दवंडी यासह स्वस्त धान्य दुकानदार यांनी प्रत्येक रेशनिंग कार्ड धारकाने आपल्या कुटुंबातील प्रत्येक सदस्यांची ई- केवायसी करण्यासंदर्भात सूचना दिल्या आहेत. मात्र, अद्याप ई- केवायसीसाठी १०० टक्के प्रतिसाद मिळाला नसल्याचे चित्र आहे. ग्रामीण भागातून शहरी भागात उपजीविकेसाठी गेलेल्या अनेक कुटुंबांचे शहरात आणि ग्रामीणमध्ये दोन्ही ठिकाणी शिधापत्रिका आहेत.
अशी कुटुंबे अनेकवेळा दोन्ही ठिकाणच्या सरकारी योजनांचा लाभ घेतात. आधार लिंकमुळे संपूर्ण माहिती एका क्लिकवर मिळणार असून, त्यामुळे केवायसी बंधनकारक आहे.
ई केवायसी न केलेल्या लाभार्थ्यांना धान्य वितरित होणार नाही असे स्पष्ट निर्देश तहसीलदार शिंदे यांनी दिले आहेत. प्रत्येकाने जबाबदारीने हे प्रमाणीकरण करून घ्यावे, असे आवाहन शिंदे यांनी केले आहे.