मोरगाव, ता. २७ : स्वारगेट- बारामती साध्या एसटी बसची कमी संख्या व सायंकाळनंतर फेऱ्या नसल्यामुळे प्रवाशांची गैरसोय होत आहे. एसटी महामंडळाने स्वारगेट- बारामती साध्या थांबा एसटी बस सायंकाळी सहानंतर दोन तासाच्या अंतराने दहापर्यंत ठेवावी, अशी मागणी प्रवाशांकडून होत आहे.
यापूर्वी पुणे जिल्हा परिषदेच्या जल व्यवस्थापन समितीचे माजी सदस्य हनुमंत भापकर, दत्तात्रेय ढोले, यज्ञेश्वर धारक, रोहिदास रासकर, अनिल लडकत यांनी या एसटीच्या फेऱ्या वाढवाव्यात, अशी मागणी बारामती आगाराकडे केली होती.
बारामती जेजुरी- शटल सेवेमध्ये गरजेनुसार बारामती आगाराकडून फेऱ्यांमध्ये वाढ केली जाते. मात्र, बारामती ते पुणे या मार्गावर असणारी मोरगाव, तरडोली, लोणी माळवाडी, लोणी भापकर, मासाळवाडी, जोगवडी जळगाव क. प, कऱ्हावागज, मेडद येथील प्रवाशांना पुण्याला जाताना किंवा पुण्यावरून येताना साधी एसटी बस मिळत नसल्यामुळे मोठी गैरसोय होत आहे. दिवसा स्वारगेटवरून जेजुरी व जेजुरीतून बारामती शटलद्वारे नागरिकांना प्रवास करावा लागत आहे.
पुण्यातील महत्त्वाच्या शासकीय, वैद्यकीय, शैक्षणिक, व्यावसायिक कामासाठी या ठिकाणचे नागरिक, विद्यार्थ्यांना सतत पुण्याला जावे लागते. मात्र, पुण्यावरून येताना पाचनंतर साधी थांबा एसटी बस नसल्यामुळे प्रवाशांची गैरसोय होत असल्याची माहिती तरडोलीच्या माजी सरपंच विद्या भापकर, सुवर्णा धारक, दीपाली धारक यांनी दिली.

बारामती आगाराने बस सुरू कराव्या
बारामती आगार व्यवस्थापनाने पाचनंतर किमान दोन तासाच्या अंतराने दहापर्यंत साध्या थांबा एसटी बस सुरू कराव्यात, अशी मागणी प्रवासी करीत आहेत. काही नोकरदार वर्गही एसटीने प्रवास करत असल्यामुळे सायंकाळनंतर घरी परतताना त्यांची गैरसोय होते. या ठिकाणी पीएमटी सुविधा सुरू झाली होती. मात्र, त्याच्या फेऱ्याही कमी झाल्यामुळे नागरिकांना प्रवास करताना विविध अडचणींना सामोरे जावे लागत आहे.