मोरगाव, ता. २१ : येथील श्री मयुरेश्‍वर भाद्रपद महायात्रा उत्सव रविवार (ता.. २४) पासून सुरू होत आहे. भाद्रपद शुद्ध प्रतिपदा ते भाद्रपद शुद्ध पंचमी अर्थात गुरुवार (ता. २८) असा पाच दिवस हा उत्सव कार्यक्रम साजरा केला जाणार आहे.
या उत्सवासाठी राज्याच्या विविध भागातून भाविक हजेरी लावतात. पाच दिवस सर्व भाविकांना श्रींचे मुक्तद्वार दर्शन, द्वारयात्रा, स्वहस्ते श्रींना जलस्नान असे यात्रेचे मुख्य आकर्षण असते. यात्रा पर्वकाळामध्ये पहाटे ५ ते दुपारी १२ वाजेपर्यंत मयुरेश्‍वराचा मुख्य गाभारा सर्व भक्तांसाठी स्वहस्ते जलस्नान आणि दूर्वा अर्पणासाठी खुला राहणार आहे. मंगळवारी (ता. २६) मोरया गोसावी प्राप्त श्री मंगलमूर्ती पालखी सोहळा चिंचवडवरून मोरगांवी येणार आहे. यावेळी सर्व मोरगांवकर ग्रामस्थ पारंपारिक ढोल, ताशा, लेझीम या खेळाने देवांचे स्वागत करणार आहेत.
प्रतिपदा ते चतुर्थी या काळात प्रभुंचा पारंपरिक राजेशाही छबिना पालखी सोहळा रात्री ९ वाजता होणार आहे. या काळामध्ये प्रतिपदा ते तृतीयेपर्यंत भूस्वानंदाधिश मयुरेश्‍वर प्रभुंची दुपारी राजेशाही सुवर्ण रत्न अलंकार महापूजा करण्यात येणार आहे. गणेश चतुर्थी दिनी पारंपरिक छबिना पालखी सोहळा होत असताना पालनहार मयुरेश्‍वर प्रभुंचा राजेशाही पारंपरिक विवाह सोहळा होऊन महायात्रेची सांगता होणार आहे.