मोरगाव, ता. १६ : मोरगाव (ता. बारामती) येथे जखमी अवस्थेत आढळलेल्या एका घार पक्ष्याला स्थानिक तरुणांनी दाखवलेल्या तत्परतेमुळे नवजीवन मिळाले. प्राथमिक उपचारानंतर या पक्ष्याला गुरुवारी (ता. १६) सुरक्षितपणे वनविभागाच्या ताब्यात देण्यात आले. येथील राहुल ननावरे, मंदार ननावरे, केतन तावरे आणि संदीप जाधव यांना बुधवारी (ता. १५) रात्री दहाच्या सुमारास एका शेताजवळ ही घार जखमी अवस्थेत सापडली होती. वाढत्या उन्हामुळे पक्षी अशक्त होऊन उडण्यास असमर्थ असल्याचे लक्षात येताच, या तरुणांनी त्याला सुरक्षित ठिकाणी हलवून प्राथमिक उपचार केले. पशुवैद्यकीय तज्ज्ञांच्या सल्ल्यानुसार रात्रभर त्याची देखभाल करण्यात आली. घारीच्या प्रकृतीत सुधारणा झाल्यानंतर नैसर्गिक अधिवासात सोडण्यासाठी वनमजूर गोरख भापकर यांच्याकडे सोपवण्यात आले.