महाळुंगे पडवळ, ता. ८ : आंबेगाव तालुक्यातील कळंब व लौकी सरहद्दीवर असलेल्या सुंभेमळ्यात लक्ष्मीबाई खंडू थोरात (वय ७०) या घरी टिव्ही पाहत होत्या. त्यावेळी घरात अचानकपणे बिबट्याने प्रवेश केला. घडलेल्या घटनेने घाबरुन न जाता आजीने प्रसंगावधान राखून मोठ्या धैर्याने प्रतिकार केल्यामुळे स्वतःला वाचविण्यात त्यांना यश आले. बिबटे अगदी घरात येऊ लागल्याने परिसरातील नागरिकांमध्ये भीतीचे वातावरण पसरले आहे.
लक्ष्मीबाई थोरात या गेल्या वर्षभरापासून सुंभेमळा येथे एकट्या राहतात. घराचा दरवाजा उघडा ठेऊन लक्ष्मीबाई नेहमीप्रमाणे शनिवारी (ता. ६) रात्री घरात एकट्या टीव्ही पाहत होत्या. आठ वाजण्याच्या सुमारास बिबट्याने घरात प्रवेश केला. कशाचा तरी आवाज आल्याने आजी समोर पाहतात तर दोन फुटांच्या अंतरावर बिबट्या उभा होता. अनाहूतपणे घडलेल्या या घटनेमुळे पूर्णपणे गोंधळून न जाता क्षणाचाही विलंब न करता आजीने धैर्याने प्रतिकार करून मोठ्याने आरडाओरड केला. त्यानंतर बिबट्याने पोबारा केला. लक्ष्मण थोरात, अथर्व थोरात, मोहन थोरात, भरत थोरात आदी परिसरातील नागरिक मदतीसाठी धावून आले. त्यांनी बॅटरीच्या प्रकाशात बिबट्या दत्तात्रेय राजाराम थोरात यांच्या उसाच्या शेतात निघून जाताना पाहिले. त्यामुळे परिसरातील नागरिकांमध्ये भितीचे वातावरण पसरले आहे. परिसरात बिबट्याची मादी आणि दोन बछडे फिरत आहेत. अनेकांनी दिवसा फिरताना त्यांना पहिले आहे.

पिंजरा लावण्याची मागणी
लौकी, कळंब, चांडोली बुद्रूक आदी गावात बिबट्यांनी शेळ्या, मेंढ्या, बैल व वासरांचा फडशा पाडला आहे. कळंब येथील सुंभेमळ्यात अगदी घरात येऊन बिबटे हल्ले करू लागले आहेत. परिसरातील नागरिकांना अनेकदा बिबट्याने दिवसा दर्शन दिले आहे. बिबट्यांना जेरबंद करण्यासाठी वनविभागाने तत्काळ पिंजरा लावावा, अशी मागणी ग्रामस्थांनी केली आहे.

वेळ रात्री आठची होती. मी टीव्ही पाहत होते, त्यावेळी घराचा दरवाजा उघडा होता. अचानकपणे बिबट्या घरात केव्हा आला, ते मला समजलेच नाही. आवाज आल्याने फिरून पहिले, असता माझ्यावर हल्ला करण्याच्या तयारीत होता. गोंधळून न जाता धैर्याने प्रतिकार केला म्हणून माझा जीव वाचला आहे.
- लक्ष्मीबाई थोरात