महाळुंगे पडवळ, ता.१३ : कळंब (ता.आंबेगाव) येथे रविवारी (ता.१३) पहाटे विहिरीत पडलेल्या कोल्ह्यास वनविभागातील कर्मचारी, शीघ्र कृती दल आणि ग्रामस्थांच्या सतर्कतेमुळे जीवदान मिळाले. त्याला विहिरीबाहेर काढून नैसर्गिक अधिवासात सोडून देण्यात आले.
कळंब ग्रामपंचायतीच्या कार्यक्षेत्रातील शिरामळा येथील शेतकरी शेखर अण्णा भालेराव यांच्या शेतातील विहिरीत कोल्हा पडला होता. तर शेतकरी भालेराव हे विहिरीतील मोटार सुरू करण्यासाठी गेले असता त्यांना विहिरीतील पाण्याचा आवाज आल्याने त्यांनी विहिरीत डोकावले. यावेळी त्यांना कोल्हा पडल्याचे निर्दशनास आले. भालेराव यांनी सुशील भालेराव यांना कोल्हा विहिरीत पडल्याचे सांगितले. त्यांनी वनपाल शशिकांत मडके यांना घडलेला हा प्रकार मोबाईलवर सांगितला.
दरम्यान, वनरक्षक संपत तांदळे, गावडेवाडी बिबट शीघ्र कृती दलाचे मनोज तळेकर, चारुदत्त बांबळे, धर्मेंद्र ढगे, हर्षद चौधरी आदींनी घटनास्थळी भेट दिली. त्यानंतर वन कर्मचारी, बिबट शीघ्र कृती दल आणि ग्रामस्थांच्या मदतीने जाळीच्या सहाय्याने विहिरीत पडलेल्या कोल्ह्यास दुपारी बाराच्या सुखरूप बाहेर काढले. त्यानंतर त्यानंतर नैसर्गिक अधिवासात सोडून देण्यात वनविभागाला यश आले.