महाळुंगे पडवळ, ता. १० : कळंब (ता.आंबेगाव) येथे पुणे-नाशिक राष्ट्रीय महामार्गाच्या दोन्ही लेनचे सिमेंट काँक्रिटीकरण होऊन जवळपास तीन ते चार महिने झाले आहेत. परंतु या कामासाठी काढलेले लोखंडी संरक्षक पुन्हा बसविण्याकडे प्रशासनाचे दुर्लक्ष होत आहे. वाहनाचा अपघात होऊन वाहन थेट २५ ते ३० फूट खोल कोसळण्याचा धोका आहे.
पुणे-नाशिक महामार्गावरील सहाणेमळा, वर्पेमळा, उडानपूल, आप्पाचा ढाबा आदी परिसरात रस्त्यावर खड्डे पडले होते. तर काही ठिकाणी संपूर्ण रस्ता उखडला होता. या परिसरात रस्त्याच्या सिमेंट काँक्रिटीकरण करण्याचे काम राष्ट्रीय महामार्ग प्राधिकरणाने केले. त्यावेळी वाहतूक अडथळा होत असल्याने रस्त्याच्या कडेला असलेले लोखंडी संरक्षक काढून ठेवले होते. या महामार्गावरून दररोज हजारो वाहनाची वर्दळ आहे. त्यातच या भागात तीव्र उतार असल्याने वाहनांचा वेग अधिक असतो. सिमेंट काँक्रिटीकरणामुळे रस्ता जमिनीपासून जवळपास दीड ते दोन फूट उंच झाला आहे. ठेकेदाराने माती मिश्रित मुरूम टाकून साईटपट्ट्याही व्यवस्थित भरल्या नसल्याने काही ठिकाणी खास खळगे तयार झाले आहेत. त्याचाही त्रास वाहनचालकांना सहन करावा लागत आहे.

रबरी गतिरोधक बसविण्याची मागणी
वर्पेमळा, ४२ मैल, आप्पाचा ढाबा, इंदिरानगर परिसरातील उडानपुलावर असलेले लोखंडी संरक्षकही काँक्रिटीकरण काम सुरू असताना काढून टाकले आहेत. तीन ते चार महिने होऊनही ते पुन्हा बसविले नाहीत. त्यामुळे पुलावरून थेट गाडी खाली कोसळण्याच्या धोका निर्माण झाला आहे. वर्पेमळा हद्दीजवळील भवानी माता मंदिरासमोरील चौकात १५ पट्टी रबरी गतिरोधक महामार्गाच्या दोन्ही बाजूने बसवावेत, अशी मागणी माजी उपसरपंच डॉ. सचिन भालेराव यांनी केली आहे.

03009