महाळुंगे पडवळ, ता. ५ : ठाकरवाडी-महाळुंगे पडवळ (ता. आंबेगाव) येथे उभारलेल्या विरंगुळा केंद्राचे उद्‍घाटन होण्याअगोदर छताचे प्लास्टर कोसळले आहे. तसेच भिंतीला ओलावा आला आहे. त्यामुळे काम निकृष्ट दर्जाचे झाल्याची तक्रार ठाकरवाडी वस्तीवरील ग्रामस्थांनी केली आहे.
महाळुंगे पडवळ येथे राज्याचे माजी सहकार मंत्री दिलीप वळसे पाटील यांनी नागरी सुविधा योजनेंतर्गत दहा लाख रुपयांचा निधी सन २०२३-२०२४ मंजूर केला होता. त्यातून ग्रामपंचायती मार्फत ठाकरवाडी येथे विरंगुळा करण्यासाठी अंदाजपत्रक करण्यात आले. एक वर्षापूर्वी कामाचे भूमिपूजन होऊन काम सुरू केले. अंदाजपत्रकानुसार काम झाल्याने ग्रामपंचायतीने ठेकेदाराला पूर्ण रक्कम दिली. परंतु विरंगुळा केंद्राचे उद्‍घाटन होण्याअगोदर छताचे प्लास्टर कोसळले असून भिंतींना ओलावा आला आहे. त्यामुळे या केंद्राचे काम निकृष्ट दर्जाचे झाल्याची तक्रार माजी सरपंच चंद्रकांत जाधव व ग्रामस्थांनी ग्रामपंचायतीकडे व गाव कारभाऱ्याकडे केली होती.
ग्रामपंचायत सदस्य डॉ. विठ्ठल चासकर, शरद सहकारी बँकेचे संचालक के. के. सैद, मुकुंद बारवे, ग्रामपंचायत सदस्य अंकुश जाधव, ठका काळे, सरपंच सुजाता सचिन चासकर, उपसरपंच विकास पडवळ, ग्रामविकास अधिकारी वनवास वासनिक आदींनी ठेकेदाराने केलेल्या कामाची पाहणी केली.

ठेकेदाराला छत गळती आणि छताचे प्लास्टर दुरुस्त करण्याच्या सूचना दिल्या आहेत. अंदाजपत्रकानुसार काम झाल्यानंतर आणि मूल्यांकन केल्यानंतर ग्रामपंचायतीने ठेकेदाराला रक्कम आदा केली आहे,’’ असे सरपंच सुजाता चासकर यांनी सांगितले.