महाळुंगे पडवळ, ता. १९ : शिक्षण विभागाने घेतलेल्या वरिष्ठ निवड श्रेणीला आणि निवड श्रेणी प्रशिक्षणाला उपस्थित असलेल्या शिक्षकांना अर्जित रजा राज्य शासनाने मंजूर केली आहे. याबाबतचे पत्र शिक्षण उपसंचालक कार्यालयाने शिक्षणाधिकारी (प्राथमिक/माध्यमिक) जिल्हा परिषद पुणे, सोलापूर अहिल्यानगर यांना दिले आहे,’’ अशी माहिती आंबेगाव तालुका माध्यमिक शिक्षक संघटनेचे उपाध्यक्ष दीपक भोर यांनी दिली.
आंबेगाव तालुक्यात सोमवार (ता. २ जून) ते गुरुवार (ता. १२ जून) या कालावधीत वरिष्ठ निवड श्रेणी आणि निवड श्रेणी प्रशिक्षणाला एकूण ७२ शिक्षक उपस्थित होते. हे प्रशिक्षण घेणाऱ्या शिक्षकांना उन्हाळी सुट्टी उपभोगण्यास प्रतिबंध झाला होता. शिक्षक आमदार जयंत आसगावकर यांच्या माध्यमातून शिक्षण विभागाकडे अर्जित रजा मंजूर करण्याबाबत आंबेगाव तालुका माध्यमिक शिक्षक संघटनेमार्फत पत्रव्यवहार केला होता. तसेच मुख्यमंत्री देवेंद्र फडणवीस, शिक्षणमंत्री दादासाहेब भुसे व माजी मंत्री आमदार दिलीप वळसे पाटील यांच्याकडे पाठपुरावा केला होता.