महाळुंगे पडवळ, ता.२१ : लौकी (ता.आंबेगाव) शेतकऱ्यांच्या विहिरीवरील विद्युत मोटारीची केबलची चोरट्यांनी चोरी केली आहे. शेतकऱ्यांचे दहा हजार रुपयाचे नुकसान झाल्याचा अंदाज आहे. वाढत्या केबल चोरीमुळे शेतकरी त्रस्त झाले आहे.
लौकी येथे शेतकरी अशोक अर्जुन थोरात व शेतकरी रामदास भिकाजी काळे यांच्या राणूबाई मंदिर बंधाऱ्याच्या जवळ विहीर आहे. शुक्रवारी (ता.१८) विहिरीवर मोटार सुरु करण्यासाठी गेले होते. त्यावेळी मोटार सुरु होत नसल्याने विहिरीत इतरत्र पहिले असता केबलची चोरी झाल्याचे त्यांच्या लक्षात आले. चोरट्यांनी मोटरीवर ओढून केबल तोडून चोरी केली असून अशोक अर्जुन थोरात यांचे दोन विहिरीवरून जवळपास पन्नास ते साठ फूट वायर चोरीला गेली आहे.
रामदास भिकाजी काळे यांचे विहिरींवरील पन्नास फूट केबल चोरीला गेली आहे. दोन्ही शेतकऱ्यांचे मिळून सरासरी दहा हजार रुपयांचे नुकसान झाले आहे. आंबेगाव तालुक्यात शेतकऱ्यांच्या विद्युत केबल, मोटर चोरीच्या घटना घडत असून यामुळे शेतकऱ्यांचे मोठे आर्थिक नुकसान होत आहे. मंचर पोलिसांनी चोरट्यांचा बंदोबस्त करावा अशी मागणी पंचक्रोशीतील शेतकऱ्यांनी केली आहे.