महाळुंगे पडवळ, ता. ९ : कळंब (ता.आंबेगाव) येथील महानुभवमळ्यात बिबट्याने केलेल्या हल्ल्यात कालवड ठार झाली आहे. या परिसरात दोन बिबट्यांचा वावर आहे. नागरिकांनी केलेल्या मागणीनुसार वनविभागाने बिबट्याला जेरबंद करण्यासाठी मंगळवारी (ता.९) सकाळी पिंजरा लावला आहे.
महानुभवमळयात विलास देवराम भालेराव यांच्या कालवडीवर सोमवारी (ता.८) सायंकाळी सहा वाजता बिबट्याला हल्ला करून तिला ठार केले. यामुळे शेतकऱ्याचे १० ते १५ हजार रुपयांचे नुकसान झाले आहे. याबाबत शिवसेना उद्धव बाळासाहेब ठाकरे पक्षाचे तालुका प्रमुख नितीन भालेराव यांनी वनविभागाला घटनेची माहिती दिली. वनपाल सोनल भालेराव, वनरक्षक संपत तांदळे यांनी घटनास्थळी भेट देऊन पाहणी करून ग्रामस्थांसमवेत पिंजरा लावण्याची कार्यवाही केली.
दरम्यान, गेल्या चार ते पाच दिवसांपासून बाबूराव रभाजी भालेराव यांच्या घराजवळ दोन बिबटे येत आहे. तसा व्हिडिओ सीसीटीव्हीमध्ये कैद झाला आहे. येथून ये-जा करताना भाजीपाला घेऊन जाणाऱ्या ट्रक चालकालाही बिबटे दिसले होते. या परिसरात शेतात काम करणाऱ्या नागरिकांनाही बिबट्याने दर्शन दिले असून डरकाळ्याचा आवाज येत आहे. त्यामुळे शेतकरी भयभीत झाला आहे. बिबट्याला जेरबंद करण्यासाठी वनविभागाने पिंजरा लावावा, अशी मागणी ग्रामस्थांनी केली होती.
03309