माळशिरस, ता. २५ : श्री क्षेत्र नायगाव येथील दसरा सोहळा पारंपरिक पद्धतीने उत्साहात साजरा करण्यात आला. मंदिरात फुलांची आकर्षक सजावट केली होती. सीमोलंघनावेळी फटाक्यांची आतषबाजी करण्यात आली. ग्रामस्थांनी शेतीतील अवजारे, वाहने तर मुलांनी वह्या, पुस्तके आदींचे पूजन केले. नवीन वाहने मंदीरा समोर पुजली गेली.
दसऱ्याच्या निमित्ताने सकाळी श्री सिद्धेश्वर महाराज व माता जोगेश्वरी यांची पूजा होऊन महाआरती झाली. त्यानंतर देवाला नैवेद्य ठेवण्यात आला. श्री सिद्धेश्वर महाराज व माता जोगेश्वरी यांचे ग्रामस्थ भाविकांनी दर्शन घेतले. ग्रामस्थांनी एकमेकांना भेटत आपट्याची पाने दिली. सायंकाळी ७.३० च्या दरम्यान श्री सिद्धेश्वर महाराज व माता जोगेश्वरी यांची महापूजा व आरती करण्यात आली. त्यानंतर सर्व ग्रामस्थ व भाविकांच्या उपस्थितीत श्री सिद्धेश्वर महाराज व माता जोगेश्वरी यांचा पालखी सोहळा काढला.