माळशिरस, ता. २१ : अक्षरसृष्टी संस्थेचे अध्यक्ष सिद्धनाथ पवार व कॅलिफोर्नियातील उद्योगपती शरद मुनोत व पुनम मुनोत यांच्या सहकार्यातून पुरंदर तालुक्यातील ३२ महिला व बचत गटांना शिलाई मशीन, पिको मशीन, शेवई मशीन, मसाला डंक व इतर साहित्य वाटप करण्यात आले. या मदतीमुळे महिला व बचत गट स्वतःच्या पायावर उभे राहून त्यांच्या कुटुंबाना मदत होणार आहे.
यावेळी बोलताना अक्षरसृष्टीचे अध्यक्ष सिद्धनाथ पवार म्हणाले की, ‘‘संस्थेच्या माध्यमातून ग्रामीण भागातील महिलांना सक्षम बनवण्यासाठी अनेक उपक्रम राबवले जातात. पुढील काळातही हे उपक्रम सुरूच राहतील. जिल्हा परिषद शाळेतील जे विद्यार्थी इस्रो व नासा येथे भेट देण्यासाठी झालेल्या परीक्षेत मुलाखतीस पात्र झाले होते अशा विद्यार्थ्यांसाठी देणगीदारांच्या सहकार्यातून इस्रोला (बेंगलोर) विमानाद्वारे सहल आयोजित करण्यासाठी प्रयत्न करीत आहोत.’’ या कार्यक्रमात महिलांनी देखील आपले मत व्यक्त केले व अक्षरसृष्टी संस्थेचे आभार व्यक्त केले. कार्यक्रमास नायगावचे सरपंच बारीकराव खेसे, उपसरपंच मनिषा कड, माजी सरपंच बाळासाहेब कड, माजी उपसरपंच चंद्रकांत चौंडकर, किशोर खळतकर, देवस्थान ट्रस्टचे सचिव राहुल कड, आम आदमी पार्टीचे संदीप सोंडकर उपस्थित होते.