माळशिरस, ता. १४ : सासवड ते यवत मार्गावर मोठ्या प्रमाणात खड्डे पडले आहेत. त्यामुळे या रस्त्यावर वारंवार अपघात होत आहेत. मात्र, प्रशासनाकडून याकडे दुर्लक्ष केले जात आहे. त्यामुळे माळशिरस (ता. पुरंदर) येथील नागरिकांनी शुक्रवारी (ता. १४) संतप्त होत प्रशासनाचा निषेध करत खड्ड्यामध्ये वृक्षारोपण केले.
माळशिरस गावातून यवतवरून भुलेश्वर घाटमार्गे सासवड ते यवत हा रस्ता जातो. या रस्त्याने माळशिरससह पूर्व भागातील पोंढे, टेकवडी, आंबळे, राजेवाडी वाघापूर, सिंगापूर, वनपुरी, उदाची वाडी, गुरोळी या पूर्व भागातील नागरिकांची सासवड या तालुक्याच्या गावाला जाण्यासाठी नियमित ये- जा चालू असते. त्याचप्रमाणे सध्या सासवड- सुपे या रस्त्याचे देखील काम चालू असल्याने या मार्गावरील पूर्व भागातील नायगाव, राजुरी, रिसे- पिसे या परिसरातील नागरिकही याच रस्त्याचा सध्या सासवड शहराकडे जाण्यासाठी वापर करतात.
या रस्त्यावर मागील काही दिवसात मोठे खड्डे पडले असून, प्रशासनास पत्र व्यवहार करूनही त्याची कोणतीही दखल घेत नाही. या खड्ड्यांमुळे वाहनचालकांना वाहन चालविताना मोठी कसरत करावी लागत आहे.
रस्त्यावरील खड्ड्यांकडे प्रशासनाचे लक्ष वेधण्यासाठी माळशिरस ग्रामस्थांच्या वतीने खड्ड्यात वृक्षारोपण करून याचा निषेध करण्यात आला. या प्रसंगी सदाशिव डोंबाळे, माऊली यादव, गणेश यादव, सुखदेव मराठे, विजय कामठे, संतोष यादव, प्रकाश यादव, दादा यादव, सोमनाथ कामठे व ग्रामस्थ उपस्थित होते.

02704