माळशिरस, ता. २ : राजुरी (ता. पुरंदर) येथील भैरवनाथ यात्रेनिमित्त आयोजित जंगी कुस्ती आखाड्यात उपमहाराष्ट्र केसरी महिंद्र गायकवाड याने मध्य प्रदेशच्या वैभव शर्माला चितपट करत ५ लाख ८१ हजार रुपयांचे मुख्य इनाम पटकावले. रात्री उशिरापर्यंत चाललेल्या या आखाड्यात राज्यभरातील मल्लांनी हजेरी लावली होती.
येथील भैरवनाथ व माता जोगेश्वरी यात्रेनिमित्त यंदा ७५ नियोजित कुस्त्यांचे आयोजन केले होते. मुख्य लढतीत महिंद्र गायकवाडने ‘गुठणी’ डावावर वैभव शर्माला आसमान दाखवले. तत्पूर्वी, दुसऱ्या क्रमांकाच्या अटीतटीच्या लढतीत कोल्हापूरच्या रोहन पवारने रशियाच्या झुभेर याला गुणांवर पराभूत करत २ लाख ७० हजार रुपयांचे बक्षीस मिळवले. सव्वा तास चाललेल्या या कुस्तीने शौकिनांच्या डोळ्यांचे पारणे फेडले.
या आखाड्यासाठी उद्योजक हरिभाऊ भगत, माजी सरपंच कृष्णाजी भगत यांच्यासह ग्रामस्थांनी मोठे योगदान दिले. कुस्तीचे पंच म्हणून वासुदेव बनकर, अंकुश भगत, आप्पा भंडलकर यांनी काम पाहिले, तर सागर चौधरी व अनिकेत कदम यांनी निवेदन केले. यात्रेनिमित्त अभिषेक, छबिना आणि रघुवीर खेडकर यांचा लोकनाट्य कार्यक्रमही पार पडला. यावेळी पंचक्रोशीतील हजारो कुस्तीप्रेमी उपस्थित होते.

02914