महुडे, ता. ४ : वाठार हि.मा. (ता. भोर) येथील चार शेतकऱ्यांच्या शेतीपंपाच्या विद्युत मोटारीच्या केबलची चोरी झाल्याचा प्रकार शुक्रवारी (ता. ४) सकाळी समोर आला.
येथील शेतकरी प्रशांत बबन मांढरे, धोंडिबा मनू खाटपे, ज्ञानोबा विठ्ठल खाटपे, दत्तात्रेय कोंडिबा खाटपे यांनी शेतीसाठी पाणी देण्यासाठी वाठार येथे नीरा नदीवर मोटारी बसविल्या आहेत. सचिन आनंदा खाटपे हे भात पिकाला पाणी देण्यासाठी मोटार चालू करण्यासाठी नदीवर गेले असता त्यांना त्यांच्या शेजारील असणारे वरील शेतकऱ्यांच्या विद्युत मोटारीला केबल नसल्याचे दिसले. पाहणी केली असता चार मोटारींना केबल नव्हती. केबल कापून चोरी झाल्याचे लक्षात येताच त्यांनी संबंधित शेतकऱ्यांना कळवले. घटनास्थळी संबंधित शेतकऱ्यांनी पाहणी केली असता साधारण प्रत्येकी चौघांच्याही मोटारीपासून स्टाटरपर्यंत अंदाजे साडेचारशे ते पाचशे फूट असलेली केबल कापून चोरट्याने चोरून नेल्याचे दिसले. यात हजारो रूपयांचे नुकसान झाल्याचे शेतकऱ्यांनी सांगितले.
या पूर्वीही यांच्यातील शेतकऱ्यांच्या केबलची चोरी झाली होती. मात्र, त्यावेळी कोणतीही तक्रार पोलिसात दिली नव्हती. भात पिकाला पाण्याची गरज असताना केबल चोरी झाल्याने शेतकऱ्यांची गैरसोय झाली. शेतकऱ्यांचे दुहेरी नुकसान झाले आहे.