हिर्डोशी, ता.९ : हिर्डोशी (ता. भोर) परिसरात खरीप हंगाम तयारीसाठी शेतकऱ्यांकडे‌ असणाऱ्या जुन्या व नादुरुस्त अवजारांची डागडुजी केली जात आहे.‌ अवजारे वापरायोग्य करून घेण्यासाठी शेतकऱ्यांची सध्या लगबग दिसून येत आहे. त्यामुळे सुतार काम करणारे व्यावसायिक शेतीच्या अवजारांची डागडुजी करण्यात व्यग्र आहेत.
पुढील काही दिवसात भात या प्रमुख पिकासह भुईमूग, सोयाबीन, घेवडा तसेच कडधान्याच्या पेरणीला सुरुवात होणार आहे. त्यामुळे शेतीच्या कामासाठी लागणारी अवजारे सज्ज करण्यात शेतकरी गुंतले आहेत.
शेतकरी वर्षभर आपल्या शेतात भाजणी, नांगरणी, मशागत, पेरणी,‌ लावणी, कापणी, मळणी, कुळवणी अशी अनेक कामे करत असतो. ही कामे करण्यासाठी विविध अवजारांचा वापर केला जातो. यात प्रामुख्याने नांगर, पाभर, गुठ्या, कुळव, शिवाळ, मोगणा, गाढवन, डवरा, तिफण, गोफण, औत, विळा, दातूळ यांचा समावेश असतो. ही अवजारे नादुरुस्त असतील तर शेतकऱ्यांचा खोळंबा होतो.‌ वेळप्रसंगी वेळेचा अपव्यय होऊन पैसा व श्रम वाया जातात. याकरिता अवजारे सुसज्ज ठेवावी लागतात. असे उत्रौली येथील शेतकरी लक्ष्मण शिवतरे यांनी सांगितले.

ग्रामीण भागात पारंपरिक पद्धतीने बैलांचे औत व लाकडी अवजारांचा वापर केला जातो. या लाकडी अवजारांची प्रतिवर्षी किरकोळ का होईना पण दुरुस्ती करावी लागते. काही शेतकरी घरच्या घरी तर काही शेतकरी सुतारांकडून अवजारांची दुरुस्ती करून घेतात.
- जगन्नाथ खोपडे, शेतकरी, नाटंबी (ता.भोर)

शेतकरी आवश्‍यक अवजारे मे आणि जून महिन्यात तयार करून घेतो. यामुळे या दोन महिन्यात अवजारे दुरुस्तीची कामे मोठ्या प्रमाणात असतात. सर्वांची शेतीची कामे एकाच वेळी असल्याने जास्तीचा वेळ देऊन दुरुस्तीची कामे वेळेत पूर्ण करून देण्यासाठी तसदी घ्यावी लागते.
- सुनील गाढवे, कारागीर, उत्रौली (ता.भोर)
01968