महुडे, ता. १० : किवत (ता. भोर) येथील गावठाणाजवळ महुडेहून भोरकडे येणारी एसटी बस गुरुवारी (ता. १०) रात्री साडेआठ वाजता रस्त्याच्या बाजूला कलंडली. बसमध्ये वाहक चालकासह दोन प्रवासी होते. सुदैवाने कोणालाही दुखापत झाली नाही.
भोर- महुडे एसटी बस महुडेकडून भोरकडे परतत असताना समोरून आलेल्या वाहनाला बाजू देताना साईडपट्टीवरील गवतातून रस्त्याचा अंदाज न आल्याने भुसभुशीत जमिनीत एसटीची चाके रुतली व बस डाव्या बाजूला कलंडल्याचे किवतचे ग्रामपंचायत सदस्य अक्षय चव्हाण, भोलावडेचे उपसरपंच प्रशांत पडवळ यांनी सांगितले. याच मार्गावर बुधवारी (ता. ९) दुपारी महुडे येथे एसटी बस गटारात जाऊन उलटली होती. यात तीन विद्यार्थिनी जखमी झाल्या होत्या. या घटनेला एक दिवस होत नाही तोच महुडे एसटीचा अपघात झाला. या रस्त्यावर खड्डे पडले आहेत. वारंवार असे अपघात होऊ नयेत, यासाठी सार्वजनिक बांधकाम विभागाने योग्य त्या उपाययोजना कराव्यात, अशी मागणी प्रवाशांकडून होत आहे.