हिर्डोशी, ता.१८ : नाटंबी (ता.भोर) येथील शेतकरी प्रकाश बाळू खोपडे यांच्या दोन म्हशींचा महावितरणच्या खांबावरून तुटलेल्या विद्युत वाहक तारेतून विजेचा धक्का लागून मृत्यू झाला. ही घटना शुक्रवारी (ता.१८) सकाळी सव्वासात वाजता घडली. यामुळे शेतकऱ्यांचे दोन लाखांचे नुकसान झाले.
शासनाने शेतकरी कुटुंबाच्या झालेल्या नुकसानीची तातडीने भरपाई द्यावी, अशी मागणी ग्रामस्थांनी केली आहे. शेतकरी खोपडे यांचा मुलगा प्रसाद हा सकाळी पाच म्हशी व तीन रेडके अशा आठ जनावरांना चरण्यासाठी रानात घेऊन चालला होता. त्यावेळी मुऱ्हा जातीच्या गाभण असलेल्या दोन म्हशी एकापाठोपाठ एक अशा जमिनीवर अचानक पडल्या. प्रसादने जवळ जाऊन पाहिले असता विजेच्या खांबातून तुटलेल्या तारेचा करंट लागल्याने म्हशी पडल्याचे लक्षात येताच त्याने प्रसंगावधान राखून तातडीने इतर जनावरांना तेथून लांब लावले. माहिती कळताच सरपंच विशाल खोपडे, पोलिस पाटील विठ्ठल खोपडे सह ग्रामस्थ घटनास्थळी दाखल झाले. त्यानंतर संबंधित अधिकारी यांना कळविले.