हिर्डोशी, ता.२१ : भोर तालुक्यात विश्रांतीनंतर पावसाचे जोरदार पुनरागमन झाल्याने भात पिकाला चांगलाच फायदा झाला आहे. वेळेवर पाणी मिळाल्याने भातासह इतर पिके तरारणार आहेत.
तालुक्यात पंधरा दिवस पावसाने उघडीप दिली होती. त्यामुळे विशेष करून माळरानांवरील भात खाचरातील पाणी कमी होऊन जमिनीला भेगा पडण्याची भीती निर्माण झाली होती. त्यात बेनणी करून रासायनिक खतांचा मारा शेतकऱ्यांनी दिला होता. मुबलक पाण्याअभावी पिके सुकू लागल्याचेही जाणवू लागले होते. त्यामुळे पिकांना वाहळांचे पाणी देण्यासाठी शेतकरी प्रयत्न करताना दिसून येत होता. परंतु गेल्या तीन चार दिवसांपासून पावसाने पुनरागमन केल्याने शेतकऱ्यांना दिलासा मिळाला आहे. गुरुवार (ता.२१) पासून पावसाचे प्रमाण कमी झाले आहे. पिकांना आवश्यक पाणी मिळाल्याने पिकांची वाढ चांगली होऊन पिके तरारण्याची आशा शेतकऱ्यांमध्ये निर्माण झाली आहे.